Подпоручиквилин чин ва чергес-чухва гайила кхьей чiал

Зи и чухва Межнунан яр Лейладив за гекъигзава,

Фирдаусдин гинибашдин бафтадив за гекъигзава,

Пайгъамбардин шивцел алай харадив за гекъигзава,

Кьиле авай муьгьуьббатдин жафадив за гекъигзава,

КIани ярдин кьве рацIамдив – давадив за гекъигзава.

Кьиляй кьилиз и парталдин чIугуртIа за шикил-суьрет,

Барабар я адав вири и дуьньядин мални девлет.

Эй бейниван, чир тежедай за чIугвазвай кефни лезет,

За яргъияр ийидач ваз, зиди жеда куьруь суьгьбет:

Ам Кябеда авай хьтин парчадив за гекъигзава.

И партал за алукIайла, заз женнетдиз фейи хьиз я,

Ана авай булахрай за наз мижеяр хъвайи хьиз я,

Лапни иер къизилгуьлдин атирар зал къвайи хьиз я,

Лезетрин, кеф-кефиятдин кукIушдал зун хьайи хьиз я,

Ам зи таъсиб хкаж хьайи гьавадив за гекъигзава.

Акьван заз хуш я и партал, затI жеч чилел икьван иер,

Кьит я тариф авун патал шииратдин мумкинвилер.

Ихьтин гуьзел шейиник са рехне-нукьсан женни мегер?

Назиквилиз, чIагайвилиз, багьавилиз эвез тежер

Ам гьар жуьре нямет алай суфрадив за гекъигзава.

Мад гъейри са гинибашдихъ адахъ хьтин жедач парпар,

Ихьтин партал цваз алакьдай женни ахьтин магьир устIар?

Вилик адан михьивилин усал жеда багьа къашар,

Адахъ галай атирдини твазва михьиз зи кьиле гар,

Ам гьар жуьре цуьквер алай хунчадив за гекъигзава.

Адан тариф югъди-йифди датIана зи мецел жеда,

Мани лугьуз галатдач мез, мани даим рикIел жеда,

Адан этег, адан хилер, адан чIул – зи гъезел жеда,

Заз ам цIийи дуьнья хьиз я, даим адахъ цIигел жеда,

Ам якъутни мержан авай дерьядив[34] за гекъигзава.

Галат тийиз, рикIин къеняй ийизва за даим алхиш,

Ийизва за хийир-дуьа касдиз, авур заз ам багъиш,

А чIехи кас лайихлу я тарифдиз, гьич тежер пузмиш.

И парталдин тариф ийиз Ахцегь назим жеда къизмиш,

Ам Киранни, Цезаранни абадив за гекъигзава.

* * *

ЦIийиз хьанвай черел куьрпе Аллагьдин нур галайди хьуй,

Буба хьтин, гьам диндал, гьам дуьньядал, рикI алайди хьуй,

Ам Худади чаз ганвай са цIийи луьълуьъ[35] я, лугьуда,

Къуй халкьарин арада ам кьетIенвилер авайди хьуй.

Ахцегь назим, дуьа ая: ви дустуниз хьанвай аял

Дережайрив агакьдайди яз и чилел атайди хьуй[36].

* * *

За вучин, гьар вафасуздаз завай вафа кIанзава,

Зипатав къвез, за икрамун, вичиз сафа кIанзава.

Вичин рикIе пехилвални хиянатвал авайдаз

Вичиз регьят, амайбуруз хьунухь жафа кIанзава.

* * *

И дуьньядик умуд кутун нефсинин я къативал,

И дуьньядиз гьич яб тагун – рикI-жигердин михьивал.

Дуьньядин мал далу яз кьун – чир тахьун я гьар са шей

Терг жедайди, са Худадиз хас яз даим диривал.

* * *

Вафалу дуст акунач заз и дуьньяда дустарикай.

ЧIур жезва халкь, икрагь жезва жафа алай йикъарикай.

Гьикьван вилив хвейитIани, вафалу сад агакьдач вав,

Чарадаз бахт гудай бенде жагъидач ваз ксарикай.