Зуьгьре гъетрен нефес

Зуьгьре гъетрен нефесди зи дакIардал

Нехишзава, рекъиз къайи шагьвардал...

Вуна вилер чуьнуьхзава регъуьла,

Аян тирхьиз кьилел къведай шикилар.

Зуьгьре гъед вич килигиз чи гуьруьшдиз,

Ви хатур за хач цуькведин пиришдив,

Алцурдач вун, хъел гъидач ваз уьтери...

Лифре хьиз, лув гузва зал ви гъилери.

Шадвал ая и пакаман сегьнедал,

Чи руьгьер икI акахьнавай бередал!

Зун кис жеда сирлувилин гьавада,

Чи бахт экуь я лугьуз вун рахада...

Чун саналлаз акуна чи михьивал

Шаклуди яз гьисабдай кас хьайитIа,

Гьиссдач чна серсервилин къайивал, –

Зуьгьре гъетре чи шагьидвал ийида.

* * *

Гьуьлуьн кьер я баябан.

Ашукьбурун жуьтери

Гелерзава къумадал,

Шимерал хьиз къветери.

Зи са пата гьуьл ава,

Муькуь пата муьгьуьббат.

Адалай вил аладиз,

Зи рик1ева мусибат.

Кьакьан цава рагъ ава,

Зунни ала чилерал.

Ашкъидикай рахайла,

Рагъ кьада за гъилерал.

Къвез кIваче гьуьл акьурла,

Кузвай руьгьдиз хуш жеда.

КIанидан гъил хкIурла,

РикIин паргъа буш жеда.

Заз къуватар гузвайди

Сад гьуьл, рагъ я муькуьди.

Зун куькIуьрна кузвайди

Я анжах зи кIаниди.

Гьуьлуьн кьерен къумадал

Ахварава луьтквеяр.

Зи кIанидан кIвачерик

Къвез ярх жезва лепеяр.

* * *

Таквадайдаз такурай,

Заз, яр, вири аквазва.

Гуьзелвилин алемда

Чун кьвед санал авазва.

Гзаф ава гуьзелар,

Са вун рикIиз чими я.

Ви вилерин гьуьлерал

Кузва гъетер – гимияр.

За авай гаф лагьайла,

Кваз такьаз, хупI саз я вун.

Девлет ятIа гуьзелвал,

Лап девлетлу кас я вун.

Герек туш ваз тариф зи,

Куьз я ваз таж гафаркай?!

Ярашугъ я тахтни таж

Хранвай ваз нураркай.

УстIар тиртIа ашкъидин,

Ви нур гъиле кьадай за.

Гзаф надир тварар хьиз,

Ам дуьньяда цадай за.

Ам зини ви дуьньяда

Цадай, магьсул вилив хуьз.

Зун устIар туш. Ви нур заз

Хуш я жуван рикIив хуьз.

Гуьзел рушар гзаф я,

Лугьуз, катмир синерай.

Ви гуьзелвал садазни

Аквадач зи вилерай.

Къумукъ чIалай.

Мегьамед Агьмедов