Абдулла Даганов

ЖАМИДИНАН РУЬГЬДИЗ

Чидач, вучиз хьанатIа икI: уьмуьрда

Сада садаз бахшнач чна шиирар.

Къе за, гьатна чIулав йикъан есирда,

Жагъурзава рикIяй чIалан ивирар.

Садлагьана, гьич са гафни талгъана,

Геж жезвай хьиз, тади кваз вун хъфена.

Шумудни-са рекьяй вун физ-хтанай,

И рекьяй вун хкведач мадэлкъвена.

Накь ван ийиз таз бокалрив звягърягърин,

Расул хайи югъ чна къейд авунай.

Къе агъузна лувар лекьре Миграгърин,

Туна рехи Шалбуздагъни гъамуна.

Гьеле накь чун Эседуллагь дуст галаз

Ацукьнавай гьуьлел «Хазар» кафеда.

Гьуьл ргазвай агьузардин ухьт галаз,

Чайкайрикни къал квай тежер жуьреда.

Вун абуруз килигзавай сефилдиз,

На лугьузвай: «Куьруь тушни уьмуьр xyпl!»

Налугьуди, симерихъ ви гуьгьуьлдин

Ажалдин тIуб галукьзавай – магьир тIуб.

Вуна рикIел хкизвай гьар шаир саз,

Цуькведамаз хару ягъай къастар чиг:

Омар-Гьажи, Гъазим-Бегни Алирза,

Внуковни Амир-Гъази – дустар чи.

Абур гьар сад, магьрумвилин гелер таз,

ЦIайни тIал яз гьатнава чи рикIера,

Лугьузвай на, мягькемдиз чи гъилер кьаз:

«Жедач етим чи Союздин сенгерар!»

Зун зи хайи ГочIобдиз гьикI хъфида,

Дуст Жамидин, текдаказ, вун галачиз?

Хуьруьнвийриз вуч ихтилат ийида,

Хуьруьн мугьман, гьуьрметлу кас амачиз?

Хкаж хьана Хунададин синерал,

Чун булахдал фвнай, адан гьамга хъваз.

«Зун булахдин вилик къвазда метIерал!» –

Лагьанай на, яд мелгьем хьиз гъапа кьаз.

Новгороддин куьчейра чун авай накь,

Горький хьайи чкайрал кьил чIугунай, –

Чи Мегьамед Агьмедовни галай чахъ! –

Гьамзатован межлис гурлу авунай.

Ана Ольга Савинова лугьудай

Са гуьзелди кьабулнай чун захадиз.

Туькьуьл хабар агакьайла, агъузар

ЧIугвазва къе ада, хайи ваха хьиз.

Дагъустандай ана кьегьал рухваяр

Гьалт хьанай чал: Седулагьни, Юнусни,

Мегьамедни Шамил – рикI-гъил ахъа яз,

Гьар камуна хуьз алакьдай намусни.

Гьабуруни чIугвазва ви хажалат,

Амма ви руьгь хкаж хьана цавариз,

Беден хуьре хьанва сура ферикъат,

Адан кьилихъ яс чIугвазва дагълари...

Чидач, вучиз хьанатIа икI уьмуьрда

Сада садаз бахшнач чна шиирар.

Къе за, гьатна чIулав йикъан есирда,

Жагъурзава рикIяй чIалан ивирар...

Авар чIалай.