Молитва четвертая Архангелу Михаилу

Идеже осеняет благодать твоя от Господа, Архистратиже Божий Михаиле, оттуда изгонится диавола сила. Не терпит бо света твоего видети, спадый с небеси денница. Тем молим тя, огненосные стрелы его, движимые на нас, угаси своим дуновением. Аминь.

Молитва пятая Архангелу Михаилу

Святый Архистратиже Божий Михаиле и прочие Небесные Силы бесплотные, молите Бога о мне, страждущем, да отторгнет Господь от меня всяческие пагубные помыслы, неотвязно меня терзающие и доводящие меня до отчаяния, колебания в вере и телесного изнеможения. Великий и грозный страже, Архистратиже Михаиле, огненным мечем отсекай врвга рода человеческаго и всех приспешников его, хотящих погубить мя, и стой нерушимо на страже дома сего, всех живущих в нем и всего достояния его.
(Из сборника молитв афонского старца Пансофия.1848г.)

АКАФИСТ СВЯТОМУ АРХАНГЕЛУ МИХАИЛУ

Кондак 1

Избранный Небесных сил воеводо и рода человеческаго заступниче, сие тебе, иже тобою от скорбных избавляеми, благодарственное приносим пение: ты же, яко предстояй Престолу Царя Славы, от всяких нас бед свобождай, да с верою и любовию в похвалу тебе зовем: Радуйся, Михаиле, великий Архистратиже, со всеми Небесными силами.

Икос 1

Яко ангельских огнезрачных ликов предстоятеля, ангельскими убо и языки подобаше восхвалити тя, Михаиле; но дондеже вразумляемии тобою навыкнем безплотных глаголом, услыши, аще и от человеческих, обаче благодарных устен, сицевая: Радуйся, звездо мира первообразная; Радуйся, свеще истины и правды златозарная. Радуйся, лучей света несозданнаго первый во ангельских ликостояниях приемниче; Радуйся, Ангелов начальниче. Радуйся, в нем же наивящше светлеется слава Творческия Десницы; Радуйся, имже красуются соборы всех существ безплотных. Радуйся, Михаиле, великий Архистратиже, со всеми Небесными силами.

Кондак 2

Провидяще веры очесы величие духовныя красоты и силу молниеносныя десницы твоея, Архангеле Божий, мы, яко земнии и плотию обложеннии, удивлением, радостию и благодарением ко Творцу всяческих исполняемся, зовуще со всеми Небесными силами: Аллилуиа.

Икос 2

Разум чист и свободен от страстей испроси нам, пречудный Михаиле, Небесных чинов начальниче, да, вознесшеся мыслию от земных к Небесным, хвалебную песнь воспоем ти сице: Радуйся, Божия неизреченныя красоты и доброты ближайший зрителю: Радуйся, всеблагих советов Пресвятыя Троицы приискренний таинниче. Радуйся, превечных судеб Троических верный исполнителю; Радуйся, емуже с любовию удивляются Небесная воинства. Радуйся, егоже с верою прославляют земнороднии; Радуйся, егоже трепещут адския силы. Радуйся, Михаиле, великий Архистратиже, со всеми Небесными силами.