Вил галамай ахвар

Акуна заз ахварай

Лезгистан хъана,

Ватандикай кьве чара

Са Ватан хьана.

Гаф сад хьана виждандин

Уьлквейрин вири:

Къадим уьлкве Алпандин

Хъувуна дири.

Хъен вегьей чи абурдал

ЧукIурна часпар,

Эхцигна мад Самурдал

Кьулан вацI – дуьз тIвар.

Денбентдиз – Цал, Партавдиз

Хълагьна Харум,

Пакудизни Маскавдиз

Хуш я и фурум.

ТIвар акьалтна Садвилин

Къизилдин муькъвел.

Накъвар хьана шадвилин

Гьар лезги хъуькъвел.

Часпар тирвал уьлкведин,

Гъил гъиле кьуна,

Къвазнава халкь бинедин,

Кьил вине кьуна.

Са тачагъдай аламат

Вилиз аквазва!

Белки, хьанва къиямат?! –

Ваъ, туш! Рахазва:

Мез галкIидай гьакимар –

Лезги чIалалди!

ГьакI чкадин алимар –

Хайи чIалалди!

Икьван гагьда баятбур

Хъхьанва таза:

«Халкь, ви йикъар регьятбур

Авурди я за!»

Хуруз гъутар ядайбур

Акъатна пара.

Президентвал кIандайбур

Гьатнава гара.

Сада пулар пайзава,

Сада – садакьа,

Руьгь буьркьуь яз зайзава

Ягьдин къадакьар.

Халкь хъуьрезва, япалай

Ийиз гьараяр:

«Икьван гагь куьн гьинавай,

Я кьей рухваяр?!

Чи Президент – Шарвили,

Гьажи Давуд я,

АкIаж тавур дарвили

Чи пак умуд я!

Премьер хьурай я Шагьдагъ,

Я Базардуьзи,

Гьабуралди я чун сагъ,

Хуьзвай чи рузи.

Руьгьдин муршид, имам яз

Хкягъин Шалбуз,

Хьайиди чаз илгьам яз,

Кутурди Намус.

Парламентдин чIехиди

Хьурай Кьулан вацI,

Халкьдин гьар са дердидин

Чидай чIални яцI».

Лагълагъчияр кат хьана,

Гар аваз кьиле…

Ахварикай кват хьана

Зун жуван кIвале.

Хвешивили, гьевесди

Кутунваз лувар,

Ахъайна са нефесдив

За папаз ахвар:

«АлукьдатIа ахвар зи,

Чан зи кайвани?

Вахъ шадардай япар зи

Баян авани?»

Ада гайи жавабдай

Гьатнач заз рехне,

Гуя пак са ктабдай

Къачунва куьгьне:

«Ксудайбур галчIурда

Ширин ахварри.

Кадгъай крар жагъурда

Уях рухвайри!»

2010