Студопедия

Главная страница Случайная страница

Разделы сайта

АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника






Къагьриманвал къалин я






Зи дуст Къагъриман Ибрагъимоваз

Вуч баркаван тушни и зул Белиждал! –

Налугьуди загьир хьанвай илгьам я.

Гьар са багъда, гьар са къарши уруьшда

Къати рангар гьарма сад са макьам я.

Вуч экуь я, вуч кьакьан я цаварни –

Лезги чилин авазрин им гьуьндуьр я.

Каспидилай къвезвай назик шагьварни

Шалбуздин гар туьш хьунин им суьгьуьр я.

Ихьтин чилел, меркез хьайи Алпандин,

Вун яшамиш жезва, дувул гьисс ийиз.

Вахъ са пеше ава – хвавал Ватандин,

Адан какур кьисмет рикIяй куьз ийиз.

Лезгистанди, чиз ви ягьдин лигимвал,

Ви чагъиндиз гузвай къимет якъин я:

«Халкьдин руьгьдин ивиррин хуьз къадимвал,

Къагьриманан къагьриманвал къалин я».

Ви авазрай диде-чилин ван къвезва

(Квачерик чил квайдан бегьер фараш я).

Абур ван жез къариблухда тан къвезвай

Къураба тар я зун... Арбен Къардаш я.

2006


* * *

Писвал чилел артух хьанва,

Писвилин кац ракъиник ква.

Хъсанвилин язух хьанва,

Ам писвилин викIиник ква.

 

Хъсанвилихъ амач такьат,

Кьуру хьанва булах адан.

Техъйиз адан гъавурда гьат,

Жезвач гила чIалахъ адан.

 

Писвилин кьил вине хьанва,

Адаз пара гьуьрмет ава,

Адакай къе чешне хьанва,

Адахъ рябет, девлет ава.

 

Хъсанвал къе, кIирна гардан,

Писвилин лукI, чавуш хьанва.

Хъсанвилел – парар залан,

Чанда дердер аруш хьанва.

 

Писвили са гана суал

Хъсанвилиз: «Эхда гьикьван?»

Жаваб гана: «Дуьньяда зал

Хъсанвал тIвар аламай кьван».

2007

 


* * *

Гьакъикъи я Машрикь патан шаирар,

Аллагьдин тIвар эвезай «яр» гафунив.

Жагъай касдиз муьгьуьббатдин ивирар

Агакьайдай я вич чIехи Гьахъунив.

 

Аллагьди хьиз рикI кудай кас, регьим гвай,

Яр тушни бес, багъишдайди тахсирар,

Ви эвелдин, ви эхирдин илим гвай,

Шегьре рекьел гъизвайди ви жигъирар?

 

Ви гафарин ван жедайди, къениди,

Жумартди – ваз гудай чIавуз берекат –

Гьам тушни бес, вахъ авай сад, кIаниди,

Сабурлуди, хуьзвайди ви мярекат?

 

Аян тирди ви рикIевай ниятар,

Аквазвайди ви гьар са кар, са кам ви

Яр тушни бес, артухзавай мурадар

Кьилин чешме – гурзавайди илгьам ви?

 

Акъатайла са гунагь, са хата вай,

Эхир жедач ярди гудай жазайрин.

Агъузарда, чукурда вун патавай,

Ван хкведач ви тубайрин, сузайрин.

 

Уьмуьрдикай жегьнем жеда чилерал,

Руьгьни беден цIа авай хьиз жеда вун.

Ярдин вилик акъвазда вун метIерал,

Дуьа ийиз, шазда ийиз шеда вун.

 

Дамахар гваз рахада вав багьади:

«Заз ваъ, вуна минета Сад УстIардиз».

Лугьуда ваз даим гьахълу Худади:

«Заз ваъ, вуна дуьа ая ви ярдиз».

 

Кьве рикIин яз, накъвар алаз вилерал,

Вун уьмуьрлух аламукьда метIерал.

2007

 

 


* * *

Шегьре вилик экIяй жезва,

Къизгъинвал гуз чархариз.

Ширин мани рикIяй къвезва,

Багъишнавай гатфариз.

 

Рагъ чкIанвай цавун генгвал

Барабар я Худадиз.

Адан кIаник квай къешенгвал

Буьркьуьдазни аквади.

 

Шегьре рекьи чилин майдан

Пайнава кьве чкадал:

Са пад – дагълар, са пад – аран,

Инсан ава арада.

 

Аран ава ахъайна цуьк,

Къацувилин сегьнеда.

Акъвазнава кукIушар тик,

Аваз михьиз живеда.

 

Кьилел – Аллагь, чилел – инсан,

Адан руьгьдин бинеда –

Кьуьдни гатфар, дагъни аран,

Йигинвални – шегьреда.

 

2007







© 2023 :: MyLektsii.ru :: Мои Лекции
Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав.
Копирование текстов разрешено только с указанием индексируемой ссылки на источник.