Зи дуст Азиз Мирзебеговаз

(Юбилейдин тебрик)

Дуст дустунин далудихъ дагъ, эй, азиз.

Къазанфар Зулфукъаров

ЯхцIурни цIуд хьана ви яш, эй, Азиз,

Са-сад абур рикIел хкваш, эй, Азиз.

Аял йисар… Хайи хуьруьн уьруьшра

Гьабур тушни цуькверин раж, эй, Азиз?!

Жегьил йисар цIарар хьана шиирдин,

Илгьамни ви хьана сирдаш, эй, Азиз.

Хьайила ваз яшар Иса Месигьдин,

Дуьнья хьана алаш-булаш, эй, Азиз.

Руьгьда намус, рикIе чирагъ туьхуьрнач,

Вун гьахъунин хьана юлдаш, эй, Азиз.

Агакьайдаз камалдин тик кукIушрив

Яшдикай пар ваъ, жеда таж, эй, Азиз.

Фейи гьар йис Тарих лугьур гуьзелдиз

Чна вегьей я са шабаш, эй, Азиз.

Санхъай – уьмуьр женнетдихъ, я жегьнемдихъ

Чна гузвай жезва даш-баш, эй, Азиз.

ГьикI ятIани уьмуьр ажеб нямет я,

КIан я рикIиз хьун ам фараш, эй, Азиз.

Алад вилик! Гур уьмуьрдихъ къанихвал

Са чIавузни мийир яваш, эй, Азиз!

Яш я лугьуз, жегьилвилер гадармир,

Рушаризни гагь-гагь тамаш, эй, Азиз!

Ви са виш йис тамам жедай межлисдал

Тамада хьуй Арбен Къардаш, эй, Азиз!

I0-ноябрь, 2009.

РЕКЬИМИР, ЦIЕГЬ…

Рекьимир, цIегь, гатфар къведа.

Лезги мисал.

Рекьимир, цIегь, гатфар къведа,

Къацу векьер экъечIда.

Вал як къведа, вал чIар къведа,

Каш-мекь вавай къекъечIда.

Валай машгьур мад маса цIегь

Чидач лезги магьалдиз.

Дава хьана ви нек, ви мегь

Шумуд гишин аялдиз.

Ви иеси, муьхце – алаф,

Чанда аман амачиз,

Кьуьдди жедай чIугваз хилаф,

Кесибвилин тагъма чиз.

Вун язухдин умуд хьана,

Умуд гунуг суваб я.

Кьуьд, лагьайтIа, кубут хьана:

Вахъ турди хам-кIараб я.

ХъуьтIуьн тум лап яргъал хьана,

Эхна вуна азабар.

Вакай халкьдин мисал хьана

Хьайивиляй алабар.

Кьил денгдайла, яз буш гафар,

Хиве кьунрин барбиди:

«Рекьимир, цIегь, къведа гатфар», –

Лугьуда гьар лезгиди.

Чир хьана, цIегь, гьадалайни

Зурба кар ваз – сирлу гуж:

Гаф гузвай гьич садалайни

Гатфар атун аслу туш.

Амма умуд ама ви чагъ,

Ава ихьтин са карни:

ХъуьтIуьзни гагь хъуьреда рагъ,

ЧIимел жеда гатфарни…

Рекьимир, цIегь, гатфар къведа,

Къацу векьер экъечIда.

Вал як къведа, зал чIар къведа,

Каш-мекь чавай къекъечIда.

15.11.2009.