Поместнаго собора до Антиохии Сирстеи. Правило 13. 3 страница

(л. 51)[204] С обора Антиохийскаго правило 20.

Ц ерковных[205] ради потреб дващи в лете да бывает собор в коейждо области, первое убо в 4-ю неделю по пасце, второе же в 10 день перворетия[206].

Т олкование.

О сем писано есть в 37-м правиле апостольстем, яко оставлено есть еже дващи в лете в коейждо области собору быти. И осмое правило 6-го Вселенского собора, иже в Трулле полатнем, и 6-е правило собора, иже в Никеи второе собрася, повелевает единою в лете епископом коеяждо области собиратися между Пасхою и октябрем месяцем и правилная распрения и допрошания разрешати. На тех же (л. 51 об.)[207] соборах приходят презвитери и диакони и вси, иже мнятся неправедно пообидени от своих епископ, и судом от всего собора управляеми бывают. Несть же достойно никим же о себе собора творити све не сущаго в митрополии епископа, рекше митрополита.

С обора Лаодикийскаго правило 39.

П озван[208] быв епископ на собор, аще не приидет, не имыи никоеяждо нужди на пакость, несть без вины.

Т олкование.

П рилучающихся ради церковных стязании и правилных взыскании повелено бысть собором бывати по вся лета и собиратися области епископом, идеже аще повелит митрополит. Аще убо собравшимся (л. 52)[209] епископом, некии епископ позван быв приити не восхощет, сам себе в вину влагает и запрещение да приимет от собора, аще не преслушаниа ради, но телесныя ради немощи или некоея ради житейския печали приити не возможет.

С обора 4 Вселенскаго правило 19.

Д ващи[210] в лете собор бывает, идеже повелит епископ, иже есть в митрополии, и да разрешаются разпри и всяко прекословие.

Т олкование.

Я коже прежде речено бысть, дващи в лете собору быти, еже сходити всеа области епископом, идеже повелит митрополит, на разрешение и на исправление взыскаемых церковных вещей. Возбранено же бысть, еже (л. 52 об.)[211] бысть еже дващи собору бывати от 6-го правила седмаго Вселенскаго собора, иже в Никеи второе собрася, и осмаго правила шестаго Вселенскаго собора, иже в Трулле полатнем, труда ради и многих потреб, еже хотят имети на путное шествие собирающеся епископи, и повелено бысть единою в лете собору бывати от святаго праздника Пасхи даже до скончания месяца.

С обора Карфагенскаго правило 18.

И же[212] на соборех исправлена святыми отцы поставляемыи да внушит: мертву убо телеси причащение не дается, не яст бо, ни пиет, и в неведании презвитер да не крестит скончавшагося. По заповедем, иже в Никеи, (л. 53)[213] собор же на всяко лето да собирается и да посылается от митрополит сущих к коейждо области два или трие или елико же их изберет на блюдение места.

Т олкование.

Х отяи поставитися епископ или презвитер должен есть святыми отцы повеленная правилы на соборех, рекше веру, и вся церковныя заповеди в слухи своя приимати. Учащу его поставляющему его и да обещается та вся хранити, и умерших телесем да не дают причащения. Господу[214] рекшу: приимите и ядите, се есть тело мое, яко убо кто мертвому божественаго тела и крови причащения подаст, ни прияти бо, ни ясти мертвыи не может. Ни да крестити (л. 53 об.)[215] никого же умершаго, презвитерское бо неразумие, не поможет скончавшемуся, по смерти бо крещен быв от него, несть крещен. Сии же отцы, иже в Никеи, святых последующе собору на всяко лето в Кархидоне повелевают собору бывати и посылати от коеяждо области митрополиту два или елико же изберет епископ во всех епископ место сущих во области.

Т ого же собора правило 74.

Г оде[216] бысть и се, да в день бывающаго собора по вся лета, еже есть прежде десяти днии сентября, день святыя Пасхи проповедати.

Т олкование.

В различных правилех сего собора повелено есть се, еже день святыя Пасхи возвещати на соборе, (л. 54)[217], иже бывает по вся лета во Африкии прежде десяти каланд сентября, се же есть в двадесят первыи августа.

Т ого же собора правило 77.

Н е[218] приходящии по вся лета на собор, аще неволя не возбранит им, своея церкве общение довлеет им.

Т олкование.

Е лико же убо епископ в коеиждо области не приидут на собор, иже бывает по вся лета, ни старостию, ни болезнию, ни иною же никоею тяжкою нуждею возбраняеми, но леностию или небрежением се творяще, таковыя повеле собор братски наказати. Се же правило и образ наказанию полагает: повелевает бо епископом братии их не приобщатися, ни служити с ними, (л. 54 об.)[219], но токмо в своих церквах таковыи да имут общение и служат в них.

Т ого же собора правило 95.

И зволиша[220] отцы грамоты послати ко властелем, яко да потщавшесь дати им помощь изгнати донатианы, во общей потребе бывши, грамоты да посылаются Господьскому престолу и собор да бывает, идеже есть подобно. Аще не общия потребы, в своих областех да творят собор и судятся.

Т олкование.

И же убо в коеиждо области собору бывати по вся лета, собиратись епископом и вся прилучившаяся им, особно церковная стязания, по правилом изысковати же и разрешати собор повелевает. А еже от всех (л. 55)[221] областей и сущих во Африкии епископом сходитися в некоем месте и общь творити собор, аще не будет обшая вина, ея же ради должни суть снитися, инако таковому собору быти не прощает, труда ради шествия за долготу днии. Егда же будет некая общая потреба, ея же ради общему собору быти, должни суть вси епископи к держащему первый престол епископу грамоты послати, и тои, идеже аще изберет место стройно снитися, ту да соберутся.

С обора 6 Вселенскаго правило 8.

П онеже[222] не мощно дващи единою на всяко лето да бывает собор среде Пасхи и октоврия месяца.

Т олкование.

П рилучающихся (л. 55 об.)[223] ради напастей епископом и варварского нашествия, еже дващи в лете бывати собору, от сего правила отложено есть и повелено бысть единою коегождо лета собору бывати между Пасхою и октоврием месяцем.

С обора 7-го Вселенскаго правило 6.

П онеже[224] невозможно по древнему повелению дващи в лете собору бывати, да бывает единою по повелению шестаго собора, и возбранивый властель да отлучится, и небрегии епископ да приимет запрещение. Собору же бывшу, аще митрополит возмет что от епископа, да истязан будет четверицею.

Т олкование.

У твержает собор сей, еже единою в лете бывати (л. 56)[225] собору в коеиждо области, аще убо обрящется страны тоя властель, возбраняя епископом сходитися на собор, иже бывает правилных ради и евангелских вещей, таковаго отлучает. Митрополита же, небрегуща его собору бывати, кроме некоея беды и нужди, правилным запрещением повинует, повелевает же не имети власти митрополиту взяти что, от них же епископи принесоша с собою или скотину, рекше конь, или осля, или ин некии вид. Аще же обличен будет взем нечто от них, да возвратит четверицею.

Н о сии вси ни едино что-любо написаша о патриаршеском суде, от своих (л. 56 об.)[226] епископ судиму быти разве церковных правлении по святым канонам, а не чрез каноны что-любо вново вводити на развращение святей церкви, яко же ты, ответотворче, новыя законы вводиши, ово от отреченных книг, ово от внешних баснотворных сложении чрез уставленыя святыя книги по святому апостольскому правилу 85-му и 59-му правилу, иже в Лаодикии, и 24-му правилу, иже в Карфагене, и великаго Афанасия и Григория Богословца, и богословнейшаго Амфилохия.

П равило святых апостол 60.

Аще[227] кто лживое писание нечестивых еретик книги яко святы в церкви пред всеми почитает на пагубу (л. 57)[228] людем и церковному причту, да извержется.

Т олкование.

М ноги книги от еретик искажены быша на вред простейшим человеком, сиречь невеждным, якоже и от святаго Климента написаныя епископом апостольския заповеди, яже того ради собором отвержены быша. Некая же и вся отнюдь от еретик сложена быша и ложно надписание имуща, якоже се от святых отцов списаны, еже потаеныя нарицают. Таковым убо книгам отверженым быти повелевает правило и на почитание не предлагати их. Аже же которыи пред людей сия изнесет и в церкви чести покусится, аще есть епископ или презвитер или диакон, да извержется, (л. 57 об.)[229] книги же да сожгутся.

Т ы же все, еже что любо, ни творишь в ответех твоих, все страстно и разслаблено и всякия нечистоты полно, якоже вторыи Максим Киник, о нем же есть писано втораго Вселенскаго собора 4-е правило.

М аксим[230], глаголемыи Киник, от епископов чюжд и всяко не священ, иже от него в причет прият бысть.

Т олкование.

С ей Максим Киник сказается безстудный, церковь Божию раздра и многаго мятежа и молвы сию исполни. Волк вместо пастыря явлься и вся грехи прощати готов согрешающим единаго ради еже нечествовати в повелениих, рекше преступати заповеди, якоже глаголет (л. 58)[231] великии богословец Григории: Чюжд убо сии Максим от епископства да будет, и вси от него поставлении презвитери и диакони и прочии причетници чюжди священия. Послушаи же Карфагенского собора 21 правило, иже добре и богоприятне изведеная буестию поколебати покушается, несть епископ. Да како ты вводиши чрез святыя каноны суду быти на мя от своих епископ? Покажи ми, слепче, от истины, да и аз тебе покажу, яко ни митрополита достоино есть судити своим епископом, развее святейшаго вселенскаго Константинополскаго патриарха.

К арфагенского собора правило 12.

Е пископа[232] в некоей вине суща, аще не весь (л. 58 об.)[233] собор области тоя, обаче дванадесять епископ да судят, презвитера же шесть и диакона трие. И се есть о епископех, а не о митрополитех и патриарсех.

4-го святаго Вселенского собора обще всем по степенем исчитает кому от кого суд прияти п равило 9.

П ричетницы[234] между собою распрю имуще, аще оставлше своего епископа, к мирским судиям приступят, по правилом вину да приимут. Причетницы же, аще имеют что на епископа, да ожидают собора. Аще же епископи на митрополита, Константиняграда патриарху да возвестят.

Т олкование.

А ще причетник имать нечто на причетника, не подобает ему (л. 59)[235] судитися пред мирскими судиями, но от своего епископа. Аще же оставлше своего епископа к мирскому судищу приступят, по правилом запрещение да приимут. Такоже и причетник, аще имать нечто на своего епископа, да приходит к митрополиту страны тоя, егда в реченное время соберутся к митрополиту всея области его епископи, тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится. Под ним же суть епископи и митрополити всех[236] областей страны тоя или от патриарха Константиняграда (л. 59 об.)[237] судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

От свитка новых заповедей Иустиниана царя. Г лава 58.

А ще[238] же причетник или ин некто вину имать на епископа, первое преподобный митрополит области тоя по священным правилом и по нашим законом таковую вещь да разсудит. И аще кто поречет сужденная, к преблаженному епископу и патриарху вещь возвестит и тои подобный тому подаст конец. (л. 60)[239] Аще же на митрополита имать что епископ или причетник или ин кто, патриарх того правления подобным образом да судит. Зри, ответотворче, где есть, иже бы патриарха свои епископи судили, ниже митрополита прощено есть епископом судити, развее патриарха.

В озражение на 8-й вопрос и ответ.

В опрос Семена Стрешнева: Е же может ли государь наш Алексей Михайлович собрать тот собор или надобно по повелению патриаршескому?

Возражение: Н игде же есть таковое правило, еже бы царем собирати соборы, паче же себе на отмщение. Апостольское правило 37-е глаголет: дващи в лете собираются епископи церковных ради вещей и божественых (л. 60 об.)[240] повелении. Смотри зде, ответотворче, како святое правило глаголет, собираются, а не собирает царь или ин кто, такожде и Перваго Вселенскаго собора 5-е правило, такожде и Четвертаго Вселенскаго собора 19 правило и Шестаго Вселенскаго собора 8-е правило, и 7-го Вселенскаго собора правило 6-е. Аще и в древния лета благочестивых царей соборы были, но по умолению, а не с повелением, якоже ныне действуется с повелением и нуждею, якоже и в девятом вопросе явно есть повелением, а не умолением.

В озражение 9-му вопросу и ответу.

Глаголеши, совопросниче, яко аз, собором что повелел Богом венчанный (л. 61)[241] государь царь, что был здесь на Москве, тоя ни во что почол и назвал собор тот сонмищем жидовским.

Ответ: [242] Аще кто чрез правила святыя собирает соборы, не есть тот собор. На Василия Великаго повелением епаршеским и на Григория Богослова повелением Иуалиевым, и на Иоанна Златоустаго повелением царевым и царицыным, и на Филиппа митрополита повелением царя Иоанна, и ни есть тии собори, ниже именуются святии, но сонмища суть, а не собори. Тако[243] Господу глаголющу: Идеже[244] о имени моем собрани два или трие, ту есмь посреде их, и паки овца моя гласа моего слушают, и Аз знаю их (л. 61 об.)[245] и последуют Ми. И паки: Аще[246] кто любит Мя, слово мое соблюдет, и Отец мой возлюбит его и к нему приидеве и обитель у него сотвориве, и[247] аще заповеди Моя соблюдете, пребудете в любви моеи, якоже и Аз заповеди Отца моего соблюдох и пребываю в того любви. Имеяй[248] заповеди моя и творя их, он есть любяи Мя.

Не[249] всяк глаголяй ми «Господи, Господи» внидет в царство, но творяй волю Отца моего, иже на небесех. Мнози рекут Ми во он день «Господи, Господи, не твоим ли именем пророчествовахом и твоим именем бесы изгонихом и твоим именем силы многи сотворихом», и тогда исповем им (л. 62)[250], яко николиже знах вас, отъидите от мене, делателие беззакония. Всяк убо, иже слышит словеса моя сия и творит их, уподоблю его мужу мудру, иже созда храмину свою на камени, и сниде дождь, и приидоша реки, и возвеяша ветри, и припрешася храмине той, и паде, и бе падение ея велие.

Что[251] же зовете мя Господи, Господи и не творите, яже Аз глаголю. Бога исповедают ведати делы же (л. 62 об.)[252] его отмещутся. Мерзцы суще и непокоривии и на всяко дело благо[253] неискусни, иже в законе хвалишися, преступлением закона Богу досаждаеши.

Блюдите[254] убо, како опасно ходите, не яко немудри, но яко премудри, искупующе время яко дние злии суть. Сего ради не бываите безумни, но разумевающе, что есть воля Божия.

И ты убо, ответотворче, пишешь: Господь глаголет: Се Яз с вами есмь во вся дни до скончания века. И[255] паки ты глаголеши о нас з жестости тогда человеческия, что ни есть говорил, Никон выговорил и слово с яростию сказано, но не надобно с плохостию роспрошати, а кто ни есть соборныя святыя со(л. 63)[256]брания называет сонмищем жидовским, надобно как еретика проклять для того диялок Григории прежние 4 вселенския соборы почитал, что четыре крепости святых евангелист.

Кто ти, плутотворче, сказал, яко святыя соборныя собрания называю жидовским сонмищем и надобно как еретика проклинать для того, что диалок Григории прежние 4 вселенския соборы почитал? Зри, яко и самый совопросник не о вселенских соборех вопрошал тя, но времене сего, их же царьское величество собра и одари, на отмщение нашему отхождению да глаголют все, еже он, государь, восхоте, якоже (л. 63 об.)[257] и самое тое их соборное деяние являет, а не о вселенских святых соборех.

Множицею выше рекохом и ныне глаголем, иже аще кто чрез правила 7-го святаго Вселенскаго собора приложит или отложит да будет проклят, якоже и ты, продерзивый, пишешь и глаголеши и новыя законы вводиши от отверженных и несведомых внешних книг.

Такожде ум имеяй, аще кто назовет сие соборище жидовским сонмищем, не погрешит истины. Аще кто разсмотрит тех деяние написаное на соборище том, все лжи полно и ни единыя истины несть.

Собором же убо бывающим по 37-му (л. 64)[258] святых апостол[259], якоже выше рекохом и ныне глаголем собравшимся. Такожде во Антиохии Сирстей в 20-м правиле глаголет: Несть[260] достойно никим же о себе собора творити свене сущаго в митрополии епископа, рекше митрополита. Такожде и в Лаодикии собора в 3-м правиле: Собиратися епископом идеже, аще повелит митрополит. Такожде и святаго Вселенского 4-го собора, иже в Халкидоне, в 19 правиле написано, еже сходитися епископом, идеже повелит митрополит, а не царь. Такожде Карфагенского собора в правиле 95-м: Егда ж будет некая общая потреба, ея же ради общему собору быти, должни суть вси епископи к держащему первый престол епископу грамоты послати, (л. 64 об.)[261] и той идеже аще изберет место стройно снитися, ту да соберутся.

Такожде и 7-го Вселенского собора в 6-м правиле глаголет: Митрополита же небрегуща его собору бывати, кроме некия беды и нужди, правилным запрещением повинует.

Такожде новых заповедей Иустиниана царя 8 грани глава 8: митрополитом собиратися к патриархом, а епископом к митрополитом.

И по седми святых вселенских соборех нигде обретается царем собранный собор, развее во Флоренце осмый был собор чрез святыя вселенския соборы собран, тамо бывшу и царю и патриарху вселенскому, но обаче беззаконно дерзнувшим. И последи собору тому прокляту бывшу (л. 65)[262] по 1-му правилу 7-го Вселенского собора и все ни во что их злодейство бысть, аще и царь был благочестив и вселенскии патриарх и со прочих патриарх наместники, но беззаконное деяние сотворшее теми отвержено бысть и со беззаконными вменено есть. О нем же последи пространнее скажем.

Како же ты, враже истины и всякия правды обчюжденне, дерзаеши нововводныя вопросы, чрез святыя правила святых апостол и святых отец вопрошены, толковати и утвержати, не стыдяся божественых законов и утвержения.

Послушай бывшаго соборнаго деяния во времена благочестиваго царя (л. 65 об.)[263] государя и великого князя Феодора Ивановича всеа Русии, еже по Божественнеи ревности на лучшую красоту святей Божии церкви устроити патриаршескии престол, еще прежде в Московском государстве не бысть тое власти, но митрополитом Московским и всея Русии именующимся по благословению святейших вселенских патриарх. И уже желаемой царьскаго величества мысли к делу приити начинающейся, и призвав царь преосвященнаго митрополита со всем освященным собором и весь свой царьской сигклит. Таже начат царь мысль свою преосвященному митрополиту и всему освященному собору и всему сигклиту (л. 66)[264] сказовати: Весте, отцы, яко излищее благочестие бысть во дни благочестивых царей во Елладе и во Африке, во Египте и в Ливии, и в Палестине, и в Сирии, сиречь в Греческой земли, в Константинеграде и во Александрии, и во Антиохии, и во Иерусалиме и в других странах, идеже неизреченная смотрения Божия содеяшася, и многочеловечный народ от тмы неведения ко свету благоразумия обратишася. Ныне же яко слышим, аз же и вы, яко тамо преславная и премногия хвалы достойная, еже в похвалу в Троицы славимому Богу и ко спасению человек устроена быша, вся попрана бысть рукама (л. 66 об.)[265] злочестивых турков. И яко ничто же от сих во благое зрится, но вся безчествуема, Богу тако изволшу в наказание наше до толика, яко тамо сущим патриархом и прочим святителем наречением святительства токмо именоватися, власти же едва не всяко лишенем, ныне то зло и зде достиже[266]. Наша же страна, якоже зрите, благодатию Божию во много разширение приходит, наипаче же благочестивая наша вера, яже на основании апостол и пророк утвержена, возрастает и множится.

И сего ради хощю, аще Богу угодно будет и писания Божественая не пререкуют, яко да в царствующем нашем граде Москве устроится (л. 67)[267] превысочаишии престол патриаршескии. И аще убо годно вам сия, возвестите ми, аз бо мню, яко ничто же в сих благочестию повреждение, но и паче предспеяние веры Христове.

Сия же слышав, преосвященный митрополит и прочии святителие и благороднии боляре совет благочестиваго царя похваляют и отвсюду утверждают, и церковь Божию, яже в Русстей митрополии патриаршския власти достойну быти глаголют. Но обаче, рекоша, благочестивый царю, аще возхощет благочестивая твоя держава, да возвестится о сем писанием вселенским четырем патриархом. И сим комуждо (л. 67 об.)[268] своими митрополиты и епископы советовавшим писанием между собою согласившемся, Богу помогающу, удобь таковое начинание к совершению приити возможет. Понеже благочестивая ти держава и мы вси имеем сих яко столпы благочестию, аще и во области поганых суть, но святая, якоже рече Писание, николи же осквернена бывают. Но и паче же сего ради, да не возмнится, о благочестивыи царю, инем языком, наипаче же пишущим на святую нашу веру латином и прочим еретиком, яко в царствующем граде Москве патриаршескии престол устроися токмо единою (л. 68)[269] царьскою властию.

Благочестивыи же царь, слышав сия, не тяжко внять о сем[270], аще и властию можаше превысочаишии престол патриаршескии устроити, яко царь и самодержец, но обаче изволи повинутися воли Божией по правилом святых апостол и святых отец и святительскому совету, предпочиташе бо святителство боле царства предстояния ради олтарю и приношения непорочнаго агнца рукама сих, по Божественному писанию чтит иерея, чтит вышняго Бога, понеже иереиская честь на Бога возходит, несуществене не буди то, но премногия ради благодати, яже от Христа Бога апостолом и апостольским приемником дадеся. (л. 68 об.)[271] Слушаяй, рече, вас, Мене слушает, и отметаяйся вас, Мене отметается, отметаяйся Мене, отметается и пославшаго Мя. И паки. Приемляй вас, Мене приемлет. Наипаче же по всему являяся, яко сын и послушник святыя церкве.

И абие слово в дело произвести повеле и писанием убо царьским и святительским к четырем патриархом и ко многим митрополитом с таковым вопрошением вскоре посылаемым. Посланнии же со многим желанием пути емляхуся и благодатию Божию искомое получиша. Виждь, расколниче, святыя церкви не таино послание, якоже ныне[272]. И времени неколико немалу минувшу, абие посланнии в царствующии град Москву ко[273] (л. 69)[274] благочестивому царю приидоша, носяще с собою от четырех патриарх и от митрополит о патриаршестве совет и изложение на болшее утвержение, и писание патриарше и митрополиче и прочих епископ принесоша черлеными шарми назнаменовано и с подписанием рук и печатей святительских утвержено, их же ко утвержению благочестия к таковому изложению подписашась и печатьми утвердиша более седмидесят отец.

Возвестиша же и сие, яко поставления ради патриаршескаго яже в велицей Росии изволит святым отцем приити в царьствующий град Москву единому от патриарх, наипаче же Константино(л. 69 об.)[275]полскому, превысочайшее место имущему.

И сия слышав, благочестивый царь премногия радости исполнися. В третие же лето прииде вселенскии патриарх Иеремия со иными митрополиты и архиепископы, архимандриты и игумены, нося на рускую митрополию о патриаршестве совет и утвержение. И тако совершается о патриаршестве совет и избрание и бывает поставлен в царствующем граде Москве преосвященный Иов митрополит патриархом, в третие рукоположен святейшим Иеремиею патриархом. Первие поставлен бысть в Коломенския епископы, второе на Московское митрополичество, (л. 70)[276] третие на патриаршество, свидетелствуют тому книги поставления.

Даде же вселенскии патриарх россиискому престолу Божия церкве власть, яко по преставлении коегождо патриарха своими митрополиты и архиепископы и епископы и всем освященным собором возводити иного на патриаршеский престол, якоже и утвержения грамоты свидетелствуют о сем святейших вселенских патриарх, а не на живаго место инаго возводити. Нони же без совету вселенских патриарх.

Видел[277] ли еси, расколниче святыя церкве и попрателю святых апостольских канонов и святых отец, каковою Божественою любовию царь благочестивый (л. 70 об.)[278] возгореся, обаче же чрез святыя правила никако же смел что любо сотворити, ниже преслуша совета архиерейскаго, но во всем повинуясь Божественым велениям и з долготерпением созда дело Божие в совершение о патриаршестве, ниже таино что любо[279], якоже ныне послали ко святейшим вселенским патриархом лазутчиком о нашем отшествии.

Смотри же о сем и собора бывшаго во Цареграде, како не смели ниже вселенстии четыре патриархи чрез правила святыя дерзнути о патриаршестве московском и о прочих взыскании что любо, но со свидетелством святых правил, а не так как ты, новый (л. 71)[280] расколниче, а реку - еретиче, извержеными Климентовыми правилы и прочими Езоповыми и Воронами и иными ложными шпынскими проклятыми книгами чрез апостольское 60-е и 85-е и первое Вселенскаго 7-го собора приводиши ложная свидетелства, как Ворона сам, обходиши сушю и море, творя расколы как в Мутьянской земле, тако и зде.

Слушай, расколниче.

С оборное деяние, еже бысть написано в Константинополи, написано убо тамо еллиногрецким диалектом, в он же облечено, претече во преславный царствующии град Москву. В нем же стяжа сии, словенская (л. 71 об.)[281] диалекта одеяние, его же красоту да зрит всяко верных состояние.

С вятому и священному великому собору во имя Господа Бога и Спаса нашего Иисуса Христа, собравшуся во храме Пресвятыя владычицы нашея Богородицы и всеблаженныя приснодевы Марии, нареченныя Парамифии, сиречь Утешение, в Константинополи во дни благочестиваго и Богом венчаннаго великаго царя Московскаго и самодержца все Русии Феодора Ивановича, председателствующим святейшим православным патриархом.

Всесвятейшему Иеремию, архиепископу Константинополскому, Новаго Рима и вселенскому патриарху, (л. 72)[282] и блаженнейшему Мелетию, папе и патриарху великаго града Александрии и судии вселенскому, и наместнику всесвятейшаго Иоакима Божия града великия Антиохии и всего Востока, и всесвятейшему Софронию, патриарху святаго града Иерусалима и всеа Палестины, пришедшу пресветлому Григорию, Афанасиеву посланнику, предреченнаго благочестивейшаго царя соседящим и всесвященнейшим архиереом от всеа области восточныя церкви православным.

Мелетии блаженнейший Александриискии рече: Весте, братие, яко знаменительне, еже ко Спасу и Богу нашему любве пастырское есть тщание. Петре бо (л. 72 об.)[283] рече: Любиши ли Мя, паси овцы моя. Ея же ради вины и мы многия многажды подвиги же и труды и беды претерпехом и терпим, якоже весте, и ныне убо, понеже присланы к нам грамоты от всесвятейшаго вселенскаго брата и сослужителя нашего и прочих архиеров, просящим приити в Константиньград церковных ради нужд. Аз же и грамоты, яже из православнейшия Москвы от православнейшаго Феодора получив, и о обоих вещех пексися, нужде церковной и царьском достоинстве, молю ваше благоволение, опасно глаголемая от нас разсмотряюще, соизвествоватися нами о возглаголющихся, (л. 73)[284] еже аще праведно быти бы явилося.

Первое, убо понеже Божиею благодатию церковь Христова совершена сущи и по благочестивым догматом совершенное прият устроение во уставленых и изъявленых от самого Спаса и апостолы и отцы святыми восиявшими зде. На святом же соборе тремисты и осмиюнадесять богоносными отцы, иже в Никеи, и в последующих вселенских шестих соборех даже до седмаго, второе в Никеи собравшагося, такожде и иже между сими седми вселенскими в различная времена собравшихся поместных православных соборех, понеже убо совершение прият православных церковь, не токмо по (л. 73 об.)[285] богоразумия и по благочестия догматов и по освященному церковных вещей уставу.

Праведно есть и нам всякую церковных ограждении новину потребляти или разоряти, видящим новины всегда виновны бывати церковнаго смятения же и разлучения[286], но уставом последовати святых отец и яже наученая невредимо без приложения коего-любо и отъятия приемлющим, по первому Вселенскаго 7-го собора правилу сице имущу.

П равило 1 Седмаго Вселенскаго собора.

С вятыя[287] правила облобызающе приемлем и держим святых апостол и шестих вселенских собор, к сим же и поместных и еще же и святых отец (л. 74)[288] наших, яко единаго Святаго Духа вдохновенных. Их же прокляша, проклинаем, их же извергоша, изметаем, и их же отлучиша, отлучаем, им же запретиша, запрещаем.

И н перевод.

И же священническии[289] получивше сан ведения и правления канонных повелении, си есть воображения, яже приемлюще радостно, с богоявленным Давыдом поем владыце и Богу, глаголюще: На пути свидений твоих насладихся яко в богатстве мнозе, заповедал еси правду, свидения твоя, владыко, вразуми мя и жив буду. И вовеки пророческий глас заповедует хранити заповеди Божия и жити в них, яве непоколеблемы (л. 74 об.)[290] и недвижимы пребывают, якоже боговидец Моисей рече: В них же несть приложити и от них несть отъяти. И[291] божественный Петр, в них хваляся, вопиет: Вня же, желают аггели приникнути. И[292] Павел, аще и аггел, благовестит вам: Паче преданнаго проклят будет сим сицем сущим и свидетелствующим нам, радующимся о них, якоже кто обрящет корысть многу. Сладкобожественныя каноны утвержаем и цело пребывание их неподвижимо утвержаем, заповеданных от святых духовных труб, прехвалных апостол и шести святых всея вселенныя собор и поместных (л. 75)[293] собравшихся поданием тако в них повелении святых отец наших.