Поместнаго собора до Антиохии Сирстеи. Правило 13. 1 страница

А ще[17] никим же позван, ни умолен быв епископ, во иную область отшед, и поставит презвитера или диакона или правление некоторое церковное творит, таковая нетверда и разрушена да пребудут, а он да извержется.

Т олкование.

М нога правила обрящеши о сем (л. 5)[18] возбряняюща, еже не преходити епископу от своея области во иную и поставляти в ней презвитеры и диаконы или иное чть епископское творити, токмо аще где позван будет, умолен от страны тоя епископа таковое что творити. Аще же от своего дому во иную область пришед поставить презвитера или диакона или строение церковных вещей некое правление сотворить, нетвердым и разрушеным быти от него сотвореным и самого изврещи правила повелевают.

П оместнаго собора Сардикеискаго правило 3.

Н икоторыи[19] же епископ не позван во град да не приидет, и епископ с епископом, аще (л. 5 об.)[20] имать прю, чюжаго епископа да не призовет, аще ли же ни, да судит Римскии, ту будут чюждии.

Т олкование.

В различных правилех речено есть, еже никому же дерзнути от своего предела во иную область преходити, аще не будет позван от области тоя митрополита и от сущих с ним епископ, тожде убо и сеи святыи собор повелевает. Но аще которыи епископ с другим епископом о некоей вещи разпрю имать, и с ним да судится пред собором тою области, в ней же есть. И не подобает от иныя области разума ради неких епископ призывати, но от единех тоя области епископ судитися. И аще не угоден ему будет суд и мнит, яко не по праву осужен быв, судивыи (л. 6)[21] его митрополит и епископи да возвестят римскому папе писанием вину и суд, како осудиша и. И аще не восхощет того суда, и той или сам разсмотрив суд, аще право осужден бысть, возвестит им писанием, аще ли ни, тамо близ их сущия области епископом повелит, да сотворше собор, судят ему паки второе.

П равило 12.

П озван епископ от епископа позвавшему же его не вежде сущу, да не глаголет почасту в людех, порок бо есть невеждному и обругание епископии его и обое не без порока.

П равило 13.

Б ез нужди тяжки бедно есть епископу свою церковь надолзе[22] оставляти.

Т олкование обема правилома.

(л. 6 об.)[23] А ще которыи епископ в другии град преидет, позван бысть епископом тсраны тоя, и аще будет позвавый его епископ невежда, не ведыи добре божественых писании и учителству неискусен, позвавыи епископ да не учит люди прилежно и да не глаголет в народе много божественных писании. Таковое бо дело мятеж составляет и преобидение творит позвавшему его епископу, мнит же ся указанием таковаго учения, чюжду себе обручая церковь и люди к себе привлачая и тщася преданую ему церковь оставити и в ту преити. Сего ради убо повеле сей святыи собор, да позваныи епископ вящше трии недель от своея церкви да не останет, (л. 7)[24] но к порученым ему людем да возвратится, аще не некая нужда тяжка и вещь неудобна сотворит его вящше того пребыти от своея церкви.

П равило 18.

О [25] епископстем закоснении и о презвитерстем и диаконстем, изложеныя заповеди да имеют силу.

Т олкование.

Д а никоторыи же епископ своего стада не оставляет и во ином граде вящше трех недель не пребывает, се убо и презвитером и диаконом, да и тии боле трех недель не оставляют своих церквей.

П равило 21.

И же[26] добре и богоприятне изведеная буестию поколебати покушается, (л. 7 об.)[27] несть епсикоп, виден же быв епископ грядыи в стан, пакости да не приимет, аще позван будет прежде реченных ради грядыи, аще же инако.

Т олкование.

И же не хранит добре и богоугодне исправленых заповедей, но буестию и гордостию ино нечто паче заповеданных творити дерзнет, и чести и сана епископскаго да извержется, понеже уже исправлено есть, инако не ходити епископу в стан царев аще не царскими грамотами позван будет. Аще убо мимо грядый епсикоп хотя ити в стан царев и обитает у другаго епископа, подобает убо епископу, у него же обитает, (л. 8)[28] вопросити вины шествия его, чесо ради грядет. И аще обрящет его по тому образу, якоже прежде рехом или обидимых ради сирот же и вдовиц, да помолится о них, или иных ради таковых полезных вещей в стан царев грядет, да не спакостит ему никако же, но с честию отпустит его и да пишет о нем к сущим во области братии своей епископом всем приимати того незазорно, яко шествующа по правилом же и без соблазна. Аще же инако обрящет того в стан царев грядуща или показатися цареви хотящу или о неких непотребных вещех молитися, яже неподобна суть архиереом, не приобщатися к нему, ни грамот подписывати, (л. 8 об.)[29] ни промышления, ни единаго же отнюдь сподобити того.

К арфагенского собора правило 23.

Е пископ[30] да не идет на он пол моря, аще от стареишины страны своея отпустную грамоту не возмет о прехождении.

Т олкование.

Н и епископу, ни причетнику далече отходити от своея церкве несть достойно без повеления и без отпустныя грамоты митрополита своего, якоже Средческии и Лаодикиискии собор повелевает.

П равило того же собора 106.

Н екия[31] ради нужды хотя к церкви отъити да яве сия сотворит к Архидонскому епископу и Римскому и отпустное послание да возмет, аще ли ни, без общения есть.

Т олкование.

(л. 9)[32] Е пископ или причетник, аще восхощет поити к церкви, да скажет первие вину к Архидонскому епископу, ея же ради идет и возмет от него грамоту отпустную, и в Рим пришед покажет ю епископу Римскому и да явит ему вину, ея же ради идет к церкви, и той да разсудит. И аще будет подобна вина да возмет и от того грамоту, ею же от царя приимет помощь. Аще же кто от епископ или от причетник инако к церкви отъидет да будет без общения, сиречь да отлучится. И о сем ищи правило 11 Антиохиискаго собора и 9 правило в Средце собора.

Ш естаго Вселенскаго собора правило 20.

Е пископ[33] во ином граде в народе (л. 9 об.)[34] не учит, аще же обрящется да престанет от епископства и презвитерская деиствует.

Т олкование.

Е пископ во ином граде в народе уча, понеже гордости и буести ради, преобидит ту сущаго епископа, яко тщася посрамити и уничижити и чюждии престол себе обручити, по достоянию да престанут таковыи от епископства, иже бо чюждих желает, своих лишен будет и на презвитерское место свети того и презвитерская да деиствует. И назнаменаи се когда епископ на презвитерское место сводится, ибо 29 правило Халкидонского собора святотатство отнюдь нарицает, еже епископа на презвитерскии свести степень, и имей (л. 10)[35] сие правило преболше вселенского оного правила.

От свитка новых заповедей правило 3.

Н икому[36] же от епископ боле единого лета от своея церкви пребыти подобает, обаче аще и то будет по цареву повелению, да не творят же извета, глаголюще, яко «церкви моя во многих обидах есть», но таковая причетники или икономы или посолники подобает исправляти. Сим же без ставилных грамот не ходити, ни пришедшим же в Царьград явитися цареви, но прежде приити к пресвященному патриарху или коеиждо области посолником, от нея же и тии суть, и тем сказати вины, ея же ради прииде, и тако потом с ними входити (л. 10 об.)[37] к церкви. Подобает же епископом вестники Великия церкве или посолники патриарховыми возвещеном бывати цареви, яко да аще или праведнаго что просив у царя получити или неправедна что не получи вскоре возвратися.

И что к сим отвещаеши, глаголи.

Како ли смел еси в чюжей епархии учити и законополагати о несведомых, еже несть ти прощено от Евангелия и святых апостол и святых отец, во Евангелии же пишется.

Евангелие.

От вещав[38] убо им Иисус и рече: Мое учение несть мое, но пославшаго мя. Аще кто похощет волю его творити, разумеет о учении его, кое[39] от Бога есть, или аз о себе глаголю, глаголяи о себе, (л. 11)[40] славы своея ищет, а ищаи славы пославшаго его, сеи истинен есть и несть неправды в нем.

Н есмы[41] якоже нецыи корчемству слово Божие не от чистоты, яко от Бога пред Богом о Христе глаголем, утешение бо наше не от прелести, ни от нечистоты, ниже лестию, но якоже искусихомся от Бога верни быти, прияти благовествование. Сице глаголем не яко человеком угождающе, но Богу искушающему серадца нага, не бо в слове ласкания когда быхом, якоже весте, ниже виною лихоимания, Бог свидетель, ни ищуще от человек славу, ни от вас, ниже от инех могуще в тяготе быти яко Христови апостоли.

В идиши ли, яко не подобает инако (л. 11 об.)[42] учити или законополагати. Сего[43] ради и Господь учит, глаголя: Аминь, аминь, глаголю вам, не входяи дверми во двор овчии, но прелазя инуде тать есть и разбоиник, а входяй дверми пастырь есть овцам. И по мале: Аз есмь пастырь добрыи, вси елицы приидоша, татие суть и разбойницы, но не послушаша их овцы.

Н о[44] аще мы вам или аггел с небесе благовестит, паче еже приясте проклят да будет.

А ще[45] кто инако учит и не приходит к здравым словесем Господа нашего Иисуса Христа, иже по благочестию и учению разгордевся ничто же сведыи. И прочая.

И паки. Ш едше, рече Господь, научите вся языки, крестяще их во имя (л. 12)[46] Отца и Сына и Святаго Духа и учаще их блюсти вся елика заповедах вам. И паки рече: Шедше[47] в мир весь проповедите Евангелие всей твари, иже веру имет и крестится, спасен будет, а иже не имет веры, осужден будет. К ако вы можете веровати славу от человек приемающе славу же, яже от единого Бога не ищуще.

Т ы убо, о Паисее, емлеши ли сим веру и аще возглаголеши, яко имаши веру писанию твоему на тя свидетельствующу странному и несведомому нами, яко от овец Христовых, но волк являешися вместо пастыря, смущая и разгоняя стадо Христово не преданое тебе, аще ли не доволно ти есть?

(л. 12 об.)[48] К сим еще присовокупим.

В сех[49] святых апостол купно два правила. П равило 1.

К ождо в даном ему чину да пребывает и не преступайте заповедей, не суть бо наша, но Божия. Якоже рече Господь: Слушаяи вас, Мене слушает, и слушаяй Мене, слушает пославшаго Мя, и вас отметаяися, Мене отметается, и Мене отметаяи, отмещет пославшаго Мя.

К сим же святаго 7-го Вселенскаго собора правило 1 запрещает ниже приложити что любо или отъяти, якоже и самая истина зде явит.

П равило [50] первое. С вятая правила облобызающе приемлем и держим святых апостол и шестих вселенских (л. 13)[51] собор, к сим же и поместных, и еще же и святых отец наших, яко единаго Святаго Духа вдухновена. Их же прокляша проклинаем, их же извергоша, изметаем и их же отлучиша, отлучаем, им же запретиша, запрещаем. И н перевод.

И же[52] священническии[53] получивше сан ведения же и правления канонных повелении, си есть воображения, яже приемлюще радостно с богодухновенным Давыдом поем владыце и Богу глаголюще, на пути свидении твоих насладихся, яко в богатстве мнозе, заповедал еси правду свидения твоя, владыко, вразуми мя и жив буду. И во веки пророческии глас заповедует хранити заповеди Божия и жити в них (л. 13 об.)[54] яве непоколеблемы и недвижимы пребывают, якоже боговидец Моисей рече, в них же несть приложити и от них несть отъяти.

И[55] божественыи Петр в них хваляся вопиет, в ня же желают аггели приникнути. И[56] Павел, аще и аггел благовестит вам паче преданнаго, проклят да будет. Сим сице сущим и свидетелствующим нам радующимся о них, якоже кто обрящет корысть многу, сладкобожественныя каноны утвержаем и цело пребывание их неподвижимо утвержаем, заповеданныхот святых духовных труб, прехвалных апостол и шести святых всея вселенныя собор и поместных (л. 14)[57] собравшихся, поданием тако в них повелении святых отец наших.

От единого бо еси Святаго Духа озарени бывше, повелеша яже на ползу и их же проклятию предаша и мы проклинаем, их же извержению и мы извергаем, и их же запрещению и мы запрещаем, и их же отлучению и мы отлучаем. Не сребролюбен имуще нрав, но доволни сущими, иже возшедыи на третие небо и слышав неизглаголанныя глаголы, Павел божественый апостол яве вопиет.

Т ого же святаго Седмаго Вселенского собора.

Н еправе святых учителей Божия церкве божественыя гласы восприемлющим и яве и явствено в них благодатию Святаго Духа реченная, инако толковати же (л. 14 об.)[58] и превращати покушающимся да будут прокляти.

Т акожде и святыи Кирил Александреискии глаголет: Аще кто от исправления и утверженных богоносными отцы подвигнет что к тому, таковаго несть како нарещи строением, но преступление и попрание повелений и к Богу нечестие.

Т ого же.

От метающим гласы святых святых отец возгласившия ся о составлении правых догмат Божия церкви Афанасия и Кирила, Амвросия, Амфилохия богоглаголиваго, Леонта святейшаго архиепископа стараго Рима и прочих, еще же и вселенским соборов деяния, Четвертаго, глаголю, и Шестаго не лобызающим да будет проклят.

(л. 15)[59] В неделю первую поста.

М ы убо древнему законоположению церковному последуем, мы заповедания святых отец соблюдаем, мы прилагающих что или отъемлющих от церкве проклинаем, мы вводимое новозаконение христианохулник еретик проклинаем, мы не мудрствующих тако проклятию и анафеме предаем.

С ия суть и такова святых отец наших и учитель, яже о православной вере подвизания сих труды и болезни прият человеколюбец Господь паче всякого плодоприношения. Блажени убо и треблажени суть вси, елицы несуменным сердцем сохраняют, яже онеми укреплена и предана быша Божественая и предания и учения. Блажени (л. 15 об.)[60] убо суть, иже онеми осужденная и уничиженная. омержающе и отвращающеся хулных предании и разумения.

Г лаголеши в своем ответе в предисловии.

От вет Паисеев. А ще истина речется прение, а наипаче к тому утвержает истину, наживет на себя враги, яко Предтеча Иоанн, еже обличил беззаконнаго и рода для того, что он держал жену брата своего еще сущу живущу, яко некия глаголют, еще и чад имел от Иродиады отроковицы и до конца погубил живот свой, тако и глава отсечеся. И на се все проповедник евангелскии, а наипаче аще бы архиерей есть, должен бывает и тягость имети в душю (л. 16)[61] свою, аще не будет являти и проповедати и глаголати пред царем не стыдяся.

В озражение противо ответа Паисеина.

Т ы глаголеши, Паисею, аще истина речется, прение наипаче к тому утвержает, наживет на себя враги. И впреди о твоем презорстве показано, не баснями, якоже ты глаголеши, но истинным свидетелством, и ныне глаголю ти. Аще бы и вина моя была кая в погрешенных от мене, но не тебе единому суд или ответ творити, ниже ты видел или слышал, что любо от мене. Писанию убо глаголющу, яко не подобает осуждати кого прежде даже не увесть и слышит опасно, яже о нем, аще и мнози (л. 16 об.)[62] суть о глаголующии.

Евангелие.

Г лагола[63] Никодим пришедыи к нему нощию един сыи от них: Еда закон наш судит человеку, аще не слышит прежде от него и разумеет, что творит.

Я коже[64] много дни сотворшу ему тамо, Фист цареви сказа яже о Павле, глаголя: Муж некии есть, оставлен от Филика южник, о нем же, бывшу ми в Иерусалиме, явиша архиерее и страцы июдействии, просяша на нь пря. К ним же отвещах, яко несть обычаи римляном да яти коего человека прежде даже оклеветанный пред лицем видит клеветники, место же приимет ответа о согрешении.

Т ы же ни о клевете уведев, ниже (л. 17)[65] о клеветнике, но единому непреподобну мужу паче прокляту, аще и сигклитик клевету прием, чрез вся святыя Божия заповеди и святых апостол и святых отец каноны на соблазн людем простым ростолковал, а не от повеленных заповедей и канонов.

П равило святых апостол 75.

В[66] послушество на епископа еретик не приятен, но ни верный[67] един токмо, во устех бо рече двою или триех послух станет всяк глагол.

Т олкование.

Н е токмо на оклеветание еретик несть приятен, но ни на послушество, аще един послушествует, аще и верен есть, несть приятен. И к Тимофеови великии Павел пиша, тако рече: На презвитера (л. 17 об.)[68] послушества не приемли, аще не пред двема или треми послухи. Мню же, ни на оклеветание, им же отпадение наводится своего сана епископу или презвитеру, не доволна на два послуха, аще и верна еста и непорочна.

Ч етвертаго Вселенскаго собора правило 21.

Н е[69] искушен причетник или мирскии человек, глаголя на епископа, не приятен.

Т олкование.

А ще кто клевещет на епископа или на причетника, рекше на презвитера и диакона, подобает прежде истязати житие их, а не без испытания приимати их на оклеветание епископа. Аще причетницы суть оклеветающии или мирстии человецы да некогда будут отвержени от церкве или причащения лишени, или о гресех (л. 18)[70] неких оклеветаеми сами и себе и еще не оправдивше, или инако како житие имуще порочно, или верою чюжди, рекше еретицы, мнози бо таковии церковное благочиние смясти и превратити хотяще, клеветами вины сшивают на непорочныя и правоверныя епископы и причетники. Таковыи на оклеветание не приятни.

К арфагенского собора правило 8.

М ирскими[71] винами оплетшихся, клеветы не послушати, не приятни бо таковыи на оклеветание.

Толкование.

Р ечено есть в шестом правиле Втораго Вселенского собора, иже в Констянтине граде собравшихся святых отец, без истязания на епископа (л. 18 об.)[72] клеветы не приимати, аще первое не истязани будут оклеветлющии, какова их вера, да не будут еретицы, и потом да испытается житие их, еда како познани будут отвержени сущи от церкве и причащения не достойни, или сами о своих гресех от инех оклеветаеми и себе и еще не исправлших, ни отложивше вины греховныя, о ней же оклеветани быша. Тако убо и сие правило повелевает, никого же, подвинна суща и оклеветаема о неких прегрешениих, на оклеветание епископа не приимати.

Т ого же собора правило 127.

Н е[73] свидетелствует отлученыи.

Т олкование.

Н епорочну подобает (л. 19)[74] быти послушествующему. Сего ради убо ни причетник, ни мирскии человек, аще есть отлучен, на епископа или на причетника клеветами или послушествовати не приятен есть.

К то же ли ныне мнит ти ся Иоанне, кто же Ирод? Аз ли лишенный законныя моея церкви Иоанн или кто владыи ею Ирод? Отвещаи.

Аще ли мнишися Предтечево дело исполняя, но несть разве по причастию прелюбодеицем спомогая.

В аш вопрос[75]: Есть ли безгрешно изнова преосвящатися? Един архиерей когда пременяется от единыя епархии на другую? И прочее.

В озражение обоим вопросу и ответу.

Т ы убо, Симоне, вопрошаеши не о своих, (л. 19 об.)[76] их же ти не подобает по вышереченным правилом. Ниже ты, Паисею, ответ твориши истинною, и в сем оба истины погрешили.

Наше же возражение сим.

Не приклады пустошными, ни самомнением что любо есть.

П равило святых апостол 68 сице глаголет: Д ващи[77] поставленыи и с поставлшим его да извержется, аще не будет токмо еретическая рука первая.

Толкование.

Аще которыи епископ или презвитер или диакон второе поставление приимет от кого перваго возненавидев да извержется сам и поставивыи его, аще токмо не прилучится яко от еретик поставлен бе первие. Ибо от тех крещени не крещени (л. 20)[78] и поставлени не причетницы.

М ы же ни своею волею на престол патриаршескии взыдохом, но общим советом царского величества и всем священным собором избран, ни в слове ласкания, ни мздою даяния, якоже тогда исповедахомся во святей велицеи церкви пред Богом и святыми его, еже и ныне тожде глаголю. Такожде кляхомся правую веру, изложеную святыми в Никейстем соборе, такожде соблюдати ми и святых апостол и святых отец правила непреложно. Клят же ся и царское величество, что было ему соблюдати заповеди Божия и святыз апостол и святых отец и не сохрани и ниже нам попусти правилно что правити. О поставлении же патриаршеском ни было (л. 20 об.)[79] моего хотения и розыскания, яко есть неподобно второе рукополагатися преходящим во ину степень, ниже яко гнушаяся Бог весть. Тем се подобает, кто рукополагает, да себе непорочны соблюдут и рукоположенным от них беды не сотворят. Обаче же в толковании правила глаголет, яко епископ или презвитер или диакон перваго возненавидев, таковыи да извержется. Зде же не возгнушения ради сие тако бысть, но и устав таков преданный имеет святая соборная церковь со многим свидетелством святейших вселенских патриарх. И не аз точию един дважды рукоположен, много прежде епископи на митрополию Рускую (л. 21)[80] дващи рукоположени, аще возхощеши инде речем, ныне же взыщем от испервых како начася в царствующем граде Москве патриаршескии стол.

Ц арьствующу благочестивейшему великому государю царю и великому князю Феодору Ивановичю всеа Русии и слышав от приходящих милостыни ради от вселенных еже Царяграда и прочих святых мест архиереов и архимандритов и прочих священнаго чина, яко многобедно стало православным христианом от поганыъ житие, разжегжеся царь Божиею любовию и собра собор преосвященнаго митрополита и архиепископы и епископы с прочими священными мужи. Совет благочестия сотвори и возвести им мысль свою, яко да устроится (л. 21 об.)[81] в царствующем граде Москве патриаршескии стол. Сия же слышав, великии архиерей и вси сущии с ним и вси велможи похвалиша царево произволение, но обаче рекоша: Благочестивыи царю, аще возхощет Бог и святая ти держава, да не без совету се будет святеиших вселенских патриарх. И сим комуждо с своими митрополиты и архиепископы и епископы советовавшим писанием, между собою согласившимся, Богу помогающу, удобь таковое начинание к совершению приити возможет, понеже благочестивая ти держава и мы вси имеем сих яко столпы благочестию, аще и во области поганых суть, но святая, яко же рече Писание, николи же (л. 22)[82] осквернена бывают.

Слышав же царь, не тяжко о сем внят, урядив послов и посла ко святейшим вселенским патриархом. И желаемое получив вскоре возвращаются, грамоты носяще, возвестиша же и се царю, яко поставления ради патриаршескаго яже в велицей Росии изволили святым отцам приити[83] в царствующии град Москву единому от патриарх, наипаче же Константинополскому. В третие же лето по посланных прииде в царствующии град Москву Иеремия, Божиею милостию архиепископ Константиняграда и вселенскии патриарх, и прочии с ним. И тако вскоре Божиею милостию и всего священнаого собора избранием поставлен (л. 22 об.)[84] бысть Иов митрополит Московскии и всеа Русии патриархом, в третие рукоположен, прежде во епископы во град Коломну, та же на митрополию Московскую, та же патриархом Московским и всеа Русии. Сему свидетелствуют чиновныя книги и утверженая грамота царя и великого князя Феодора Ивановича всеа Русии и святейших патриарх Иеремии Константинополскаго и Иова патриарха Московского с прочими с пятиюдесять со двема руки подписавших и печатьми утвердившими. Егда же пресвятейшии Иеремии, Божиею милостию архиепископ Константинополя и вселенскии патриарх, царьствующаго Константинополя града достиже, (л. 23)[85] и с прочими вселенскими треми патриархи и со инеми отцы совет благочестия сотворив, изложение написав на хартии и священных отцов руками и печатми утвердив, того первопоставленнаго патриарха власть утвердиша и писание зело нарочито послаша с Дионисием митрополитом Тернова града и со инеми священными мужи, иже убо с четырми патриархи богоносных отец митрополитов и архиепископов и епископов подписашася числом осмьдесят два, яко да имать церковь Божия, яже в велицей Росии о поставлении патриаршества непременно. И сие написание на хартии благодатию Божиею и до днесь соблюдаемо в соборной апостольской церкви.

(л. 23 об.)[86] Т ако и Ермоген поставлен патриархом преже бывыи в Казани митрополитом. Т акожде и Филарет патриарх, преже бывшии Ростовскии митрополит, о нем же есть свидетелство, написаное святейшим Феофаном патриархом Иерусалимским, яко второе рукоположен есть великии государь святейшии Филарет патриарх Московскии и всеа Русии. Есть же писаное в книге Кормчей в поставлении на 34-м листе и в самом деянии все покажется явно. От него же мнози архиерее и иерее посвящены, такожде мнози крещены, мню, яко и великий государь царь и иныя царьския чада крещены им. Еда и тии, елицы рукоположены, не ру(л. 24)коположены[87], или елицы крещени, не крещени, сызнова крестити. Отвешаи, суемудрене мудрече.

Т акожде Иоасаф патриарх прежде бывыи Псковскии архиепископ, второе на патриаршество от своих митрополит рукоположен.

Т акожде и о нас, смиренных, бысть не нашим то хотением или изволением, но рукополагающих.

Смееши ли таковыя начатки взыскати, изверзи прежде святейшаго Иеремию, архиепископа Константинополскаго и Вселенскаго патриарха, иже предаде таковыи устав, и с ним и прочих святых патриарх подписавших и 79 митрополит и архиепископ, такожде и Феофана, (л. 24 об.)[88] патриарха Иерусалимского изверзи тем же уставом, рукоположившаго великого государя святеишаго Филарета Никитича патриарха Московскаго и всеа Русии, и елицы от сих рукоположени, изверзи, и елицы крещени теми, прекрести, и самого того диадиму носящаго крести и прочих с ним. По сем же и о нас таковое невежство и о рукоположеных от нас исправи и елицы крещени нами, прекрести.

Н а вторый вопрос и ответ возражение.

В торое, Симеоне, вопрошаеши не о своих, ни ты архиерей, ни ты поп, аще и самому великодержавному государю царю сведомо твое проклятое безчинство и всему, (л. 25)[89] яко играеши благодатию Христовою, еже при вознесении на Елеонстей горе, якоже пишет Лука Евангелист: Извед[90] же их вон до Вифания и воздвиг руце свои, благослови их. И бысть егда благословяше их, отступи от них и возношашеся на небо.

Ты же, ни самого того Бога зрителя таинам человеческим постыдеся, благословение апостолом и иже под ними тех наследником даное в ыгру сотворити дерзнув. Не без греха и тии будут, кто такое твое безчиние проклятое видя, не первое запретит, ни второе возбранит.

Вопрошаеши бо, яко аз не изволил, чтоб исповедались и причащалися которые люди были виноваты и указано их казнить по (л. 25 об.)[91] градским законом, добро ли чинил или худо, поучи мя. Н е сыскал еси зде во святых книгах о сем да суемудренна беззаконнаго пришелца вопрошаеши, и той тебе подобное отвещает. Нам же разве Божественых устав не буди что о себе мудрствовати. Ты убо глаголеши, яко не велел аз исповедавать разбоиников, аз того ради во все грады грамоты посылал, яко да преставше разбоиницы приходят в покаянное житие прежде даже не яти будут, ниже заповедал в поимании каятися. А еже поиманного на разбое, вскоре исповедав, причастит, не обретох такова правила. Господу глаголющу[92]: Ядыи мою плоть (л. 26)[93] и пияи мою кровь во мне пребывает и аз в нем. Слыши, совопросче, что Господь глаголет, яко «ядыи мою плоть во мне пребывает и аз в нем». Да како кто смеет таковое безстудство показати? Достоина сотворив Божественаго причастия и тогда казнить, несть такова правила, ниже обрящеши апостолу глаголющу: Тем[94] же, убо иже аще яст хлеб сей или пиет чашю Господню недостоине, повинен будет телу и крови Господни. И паки наведе да искушает же человек себе и тако от хлеба да яст и от чаши да пиет.

В асилия Великаго правило 56.

И же[95] волею убив, 20 лет запрещение приимет. Сице смотри, волею убив и своею волею пришед, покается, (л. 26 об.)[96] 20 лет не причастится.

Т ого же.

В оин[97] на брани за благоверие аще убиет, 3 лета да не приимет общения. А иже на разбое поиман, ни епитемии что любо понес, но неволею влеком злых ради дел, когда было ему очиститися.

Т ого же Василия Великаго к презвитеру о Божественей службе и о причащении и о нерадящих запрещениих.

Б люди[98], кому предстоиши и како служиши, и которым даеши причащение. Не забывай[99] владычни заповеди и святых его апостол, «не дадите бо, рече, святая псом и бисера не мещите пред свиниями», блюдите пес и яже по сих. Смотри да не убоишися человека на грех себе, не даждь сына Божия в руки недостоиных, не устыдись (л. 27)[100] никого же от славных земли в час той, ни самого того носящаго венец. Причащения же дар достоиным даваи, якоже и ты сам приял еси, им же Божественая правила не повелевают, не даваи, яко иноязычницы бо вменишася и аще не обратятся, горе тем и причащающим их.

И [101] Божественный Златоуст в толковании к Коринфом послания глаголет, яко «свяжи согрешившаго, дондеже умолит Бога, не остави его разрешена, да не множае свяжется Божиим гневом. Аще аз свяжу, Бог к тому не свяжет, аще аз не свяжу, нерешимыя того ждут узы». Аще бо быхом себе разсуждали, не быхом убо осуждени были (л. 27 об.)[102] да никто же суровства быти не пщует се и безчеловечства, но конечныя кротости и изрядного врачевания.