Гъазим-Бег Багьандов

КЬУНАРИКАЙНИ ЖАНАВУРРИКАЙ МАХ

Пуд кьун хьана – пуд стха

Дагълара кьакьан.

Са ник авай стхайриз

Рагарин юкьва.

Дуьгуь цадай стхайри,

Хъийидай ам кIватI...

Садра никIиз чIехи кьун

Хьана рекье гьат.

Дуьгуь гвена кIанзавай

Стхади чIехи…

Бирдан тамай экъечIна

Жанавур рехи.

Рахана ам: – Ша чна

Алцумин къуват.

Кьун рахана: –Акъаждай

Авач захь такьат.

– ЯтIа, за вун неда, кьун,

Рахана ничхир,

Чан аламаз туькьуьнна

Квачирди тахсир.

Стха квахьай муькуь кьвед

Хьана кур-пашман:

«Гьиниз фенастха чи?

Вуж ятIа душман?»

Кьвед лагьай кьун экъечIна

КIвалахиз никIе,

ЧIехи стха жагъурдай

Къаст ава рикIе.

Амма бирдан жанавур

Мад хьана пайда.

– Ша къуватар алцумин, –

Лагьана ада.

– Залай и кар алакьдач, –

Ажуз хьана кьун.

Жанавурдин туьтуьнай

Агъуз фена кьун.

Пуд лугьудай кьун стха

Хьана мадни перт,

Квахьна кьулан стхани

Пара хьанвай дерт.

ЭкъечIна гел жагъуриз

Стхайрин чIехи.

Бирдан адал жанавур

Туьш хьана рехи.

– Вун гьинай я, вуж я вун?

– Я адетдин кьун.

– Вуч кар аваз атанва?

– Вилив хуьзвай вун.

– Вагь, ви кьилел алайди

Вуч я, гуз нурар?

– Абур ви хук къазундай

Я хци турар!

Руфун падна вагьшидин –

Хьаначни ажеб!

Анай дуьгве ахкъатна,

Гуъгъуьнай са хеб.

Ахпа са кIек ахкъатна –

Хкажна гьа ван!

Гуьгъуьнай кал эхкъечIна,

Ахпа нехирбан.

Гуьгъуьнайни стхаяр

ЭхкъечIна кьунран:

– Ай баркалла, стха чан,

ВикIегь ва масан!

Мел авуна къуншийри,

Стхайриз куьмек

Гана дуьгуь кIватI хъийиз,

Хкана гъенек…

Амма садра, мичIи йиф

Атайла секин,

Жанавуррин лужуни

Акъудна къиргъин.

ЧIехи стха кичIела

Ярх хьана пипIе.

Кьулан стха кичIела

Къах хьана пипIе.

Жанавуррин чIехида

Экъисна кIирер:

– Недалди куьн, лагь кван чаз

Манияр иер!

ЧIехи кьунра лагьана:

– Вай хьана зи гьал.

Зи вилериз ахквадач

И дуьньядин кIвал.

Кьулан кьунра лагьана:

– Вай хьана зи гьал.

Жанавурдин руфункай

Жеда хьи заз кIвал.

ГъвечIи кьунра хкажна

Кьве карчни. Ада

Лагьана: – За лап чIехи

Жанавур неда!

Амайбурни неда за

Пакамахъ са пуд.

Нисинин тIуьн недайла,

Неда за са цIуд.

КичIе хьана вагьшийриз.

Тум тIехве туна,

Катна вири тамухъди…

Вуч хълагьда на?

Гьар са карда кьилинди,

Тир гьардаз герек, –

Кьегьалвал я, викIегьвал,

Хьун даим зирек.

Дарги чIалай.