Берлинда

Михьи, туькIвей низам авай шегьерди

Йифди эквер язава зи дакIардиз.

Налугьуди, икьван яргъал сефердиз

Атанвай заз гьуьрметзава, кьадар хуьз.

Амма зи рикI велвеладив ацIанва,

Са куьгьне тIал зи хуруда юзазва.

Са немс гуьзел, зун машгъулиз атанвай,

Byч ятIани дуствиликай рахазва.

Ихьтин тават Адам хайи йикъалай

ИкI бажагьат гьатна садаз гьавая.

Амма заз къе аквазва икI мукьвалай

Ви суьгьуьрдин гуьзелвилин гьаваяр.

Ви дамарра цIай къугъвазва ашкъидин,

Гарава вун а цIай закни кутаз кIанз.

Къачузвач звал са кIусни зи ивиди,

Я вун, я ви шегьер туш заз акваз кIан.

Вучиз ятIа чидани?.. Ви ватандай

Акъатай цIуз акъатнай чи бубаяр.

Аялар яз, юхсул хьанвай чи чанда

Гъалибвилин мурад авай зурба яз.

Чи бубаяр фидай чIавуз гьужумиз,

Чна хуьре суьреяр чи классдин

Танкарай кьаз, тахърахъ-пахърахъ, гугрумиз,

Гьалдай, гуя женг тухузва кьисасдин.

Чна чакай гъалибчияр хкудна,

Душманар ваъ, чибур хьана къугъвадай.

Чи классдин картадай тIвек акъуднай

Чна Берлин шегьер алай чкадай.

Ништа, гьикьван кьисметар а тIеквендиз

АватнатIа. – кьадар квахьун мумкин я.

Бес я, юргъун ва тIазвай зи бедендиз

Ксуз кIан я, гуьгьуьлни зи серин я.

Са квелдини тахсирлу туш, гуьзел, вун,

Заз акI я, вун са квелди заз буржлу я.

ВучайтIани, жеч къе заз хуш, гуьзел, вун,

Алат, зи тIал ашкъидилай гужлу я.

«ФУРМА»

Хциз фурма мектебдин

Хкягъзава дидеди.

– Хва чан, им я ажебди,

Къиметни туш екеди.

Шехьзава хва: – Туш герек!

А ужуз затI куьз я зи?!

Ам кIандач заз! Зун неречI

Мамедалай пис яни?

Диде хьана яру жез,

Жув жувавай квахьна зун.

РикI фикирра аруш жез,

Зи «фурмадиз» гьахьна зун...

Зи фуфайка пинеяр

Хъиягъай са бижгъер тир.

Перемдик квай дуьгмеяр

Гьарма сад са тегьер тир.

КьецIил кIвачел шаламар, –

Ганачни хупI за табни! –

Бармакдилай фенвай чIар,

Галамачир са ябни.

Зун а «фурма» алаз къе

АкуртIа и кстахдиз,

Катда кичIез-зурзаз къе

Ам дидедин къужахдиз.

Зи а «фурма» гапур туш,

Амма ам заз масан я,

Ам зи халкьдин абур-гуж

Къалурзавай лишан я.

Гьайиф хьи, ам музейра

Ядигар яз хуьзавач.

Гьавиляй чи невейриз

Ягъдин къимет чизавач.

* * *

Уьмуьр физва – кьил акъудун четин я,

Хъсанни пис какахьнава вирина.

Гьик1 тухуда кьисмет жуван эркин яз

Шаир виляй аватнавай демина?

Пайгъамбар яз рик1евай пак дердияр,

Адаз къван гуз, кьурди агъзур гьелягь я.

Амма адан рик1е къизгъин манияр

Бахт яз турди регьимлу Сад Аллагь я.

Вакайни за, зи к1аниди, кхьена,

Гьейранарна за дуьнья ви къаматдал.

Илгьамдин нур Аллагьди зал вагьена,

Чи муьгьуьббат хьун паталди къуватда.