Кондак 7. Хотя сокровенную тайну от века открыти, миру всему благовестил еси любовь Божию, о Иисусе, да не ктому Бог человеком

Хотя сокровенную тайну от века открыти, миру всему благовестил еси любовь Божию, о Иисусе, да не ктому Бог человеком, яко грозный Судия явится, но яко Отец чадолюбивый, вся призываяй к Себе. О сем радуяся, всяк земнородный с любовию да вопиет: Аллилуиа.

Икос 7

Дивную нам показа Господь милосердия Своего бездну, егда и за распенших Его на Кресте ко Отцу моляшеся. Приидите убо, людие, поклонимся Его долготерпению и, припадающе, возопиим:

Иисусе, любы истинная, озари и нас светом любве Твоея.

Иисусе, веления Отча исполнивый, научи и нас творити волю Отца нашего Небеснаго.

Иисусе, даждь нам любовь совершенную, в нейже страха нет.

Иисусе, даждь нам полноту радости Твоея.

Иисусе, влекий к Себе сердца, привлецы и нас к любви Божественней.

Иисусе, в знамение любве Твоея Тело и Кровь Твою в снедь верным даровавый, даруй нам непрестанно благодарити Тя.

Иисусе, не осуди нас, небрегущих о сем драгоценнем даре любве Твоея.

Иисусе, возбуди в нас желание приимати часть Святынь Твоих во исцеление души и тела и в жизнь вечную.

Иисусе, сподоби нас истее Тебе причащатися в невечернем дни Царствия Твоего.

Иисусе, Солнце любве незаходимое, научи и нас любви Твоей.

Кондак 8

Странно Бога любве и милосердия на смерть предана видяще, вся тварь ужасом содрогашеся, недоумевающе: како вместо дани любве и благодарения, клевету и поношение воздаша Тебе неблагодарнии людие. Мы же покланяемся неизреченному Твоему благоутробию, зовуще: Аллилуиа.

Икос 8

Весь был еси любовь к падшему человечеству, о Иисусе, егда на Кресте кротко дух Твой Отцу предав, снизшел еси в преисподняя земли, умершия вся воскресил еси, и нас радости исполнил еси, еяже никтоже возмет от нас. Темже и мы не таим сия радости, но со Ангелом всему миру глаголем: «Рыдания время преста, не плачите, яко воскресе Христос!», но Сему возопийте:

Иисусе, веселие вечное, отдали от нас рыдание слез.

Иисусе, о Марии Магдалине рыдающей умилосердивыйся, плачущим и рыдающим нам благодатное Твое подаждь утешение.

Иисусе, смертию Твоею смерть умертвивый, от смерти вечныя избави души братий и сестер наших скончавшихся.

Иисусе, Агнче Божий, вземляй грехи мира, отпусти им всякая прегрешения, вольная и невольная.

Иисусе, о Лазаре, друге Твоем, слезы пролиявый, отри всяку слезу от очес их.

Иисусе, возшедый во еже уготовати место любящим Тя, всели их во обители Твоя.

Иисусе, всем усопшим, иже не имут сродников о них молящихся, даруй Молитвенницу неусыпающую - Пречистую Матерь Твою.

Иисусе, молитвами Ея и нас, грешных, помилуй.

Иисусе, рекий, яко веруяй в Тя не умрет, но прейдет от смерти в живот, даруй им жизнь вечную.

Иисусе, Радосте безконечная, сподоби и нас радости соединения с ними во Царствии Твоем.

Иисусе, Солнце любве незаходимое, научи и нас любви Твоей.