Николай Тряпкин

* * *

Чан зи назик экв, чан зи сирлу экв!

Авач ваз са гаф, затIни туш герек.

Хкахьна сесер. Секин я кул-кус.

Рагъдандин цIарцIел рагъ хьанва ялгъуз,

Зурзазвач ерли вацIавай елкен.

Куьрс хьанва адал муьгъ гзаф еке.

Ихтияр сад я цавунни чилин,

Яргъава шегьер, гьава хьиз, вили...

Чан зи секин экв, зи регъуьзвай экв!

Булутрин лужар цавара ипек.

Я мичIи хьанвач, кузвач сана цIай.

Акъвазнава зун, лалвилив ацIай.

ЧIемерукдиз вич ухшар яз викIегь,

Куьрс хьанва вацIал муьгъ гзаф еке.

Ихтияр сад я цавунни чилин.

Къвез гьахьзава рагъ къенез зи рикIин.

ФенватIа шумуд кьилелай йисар.

Мус алатнава нисинин шагьвар.

Фенва кьилелай къуватар гьикьван.

Гумадин симер цавара кьакьан.

Анжах, легьзеда пайда жез яргъа,

Квахьзава сессуз вагъунар юргъа.

Рекье хутазва за и югъ, рагъдан...

Чан зи секин экв! Къвезвани ваз ван?

Чан зи назик экв, чан зи сирлу экв!

Авач ваз са гаф, затIни туш герек.

Хкахьна сесер. Секин я кул-кус.

Рагъдандин цIарцIел рагъ хьанва ялгъуз.

* * *

АтIуз муькъвер, кIунтIар чIулав,

Физва мад рехъ, мурдар хьиз.

Ял яда за маркун патав

Ва я багьа часпардив.

Терефдай зун физва таниш,

Къвазва туьк гьар тарцелай.

Такабурдиз жезва уьтмиш

Булутар зи кьилелай.

Гьинай ятIан къведа сесер,

Сесер гужлу, кьакьан тир,

Рахадайла кьурай векьер

Уьмуьрдикай пашмандиз.

Чин авачир каинатдин

Вилик ачух жеда рикI,

Куьхъ ятIани, муьгьуьббатдив

Мани лугьуз, шеда рикI.

Хкведа ви рикIел бирдан

Гатфарин векь, тIурфанар.

Ви кьепIинин чIигъ-пIигъдин ван

Агакьда вав атана.

Урус чIалай.