Сергей Есенин

* * *

ХъуътIуьн шуькIуь гьарайди,

Шамагъажрин лайлайди

Ксурзава там.

Яд уьлквейриз цаварай

Физва цифер авара,

ЧIугваз дерин гъам.

ЭкIяй жезва, чан гана,

Саврух чилел гам хьана,

Къизгъин я къай пис.

Хьанва нуькIер цицIи тир,

Етимар хьиз бицIи тир,

ДакIаррив игис.

Агаж хьанва мекьила,

Галат хьанва гишила,

Чуькьуьз сада сад.

ТIурфан, дили ар ягъиз,

ДакIардин кьул, вар ягъиз,

Хъиляй жезва пад.

Жив галай и гарари

Ракъурзава ахвариз

Пенжеррив нуькIер.

Абруз ахвар аквазва:

Рагъ цавара къугъвазва,

Гуз гатфариз хъвер.

* * *

Гьайиф туш заз, я шехьдач, ван хкажна,

Квахьда вири, гум хьиз ичин тарарин.

Чуплахвилин къизилди чан акIажна,

Хкведач зи йикъар жегьил чIаварин.

Гила вун, рикI, нур хкIунвай мекьерин,

Виликдай хьиз, тахъ-тахъ ийиз, рахадач.

И уьлкведи читдиз ухшар верхерин

КьецIил кIвачив кьуьлдай цIай зак кухтадач.

Къекъвераг руьгь, атанва вуч къаза вал:

Зайиф жезва цIай ви мецин куьзерин.

Квахьнава зи цицIивални тазавал,

Вилерин нур, ацIай вацIар гьиссерин.

Зи мурадар хьанва гила кьурай-кьит,

Им яраб зи уьмуьр я жал? ахвар я?

Гуя за фад са гатфарин кьиляй туьнт

Яру шивцел алаз авур чамар я.

Вири, вири чун дуьньядай куьч жеда,

Верши тарцин кишпирдин сел умун я...

Эй пак къуват цуьк гъидай ва гьич жедай,

Къадимлу хьуй вун шадвилин къанун яз.

* * *

Сагърай, зи дуст, де сагърай, зун хъфизва,

Играмиди, вун зи рикIе авазва.

Къе кьисметди чаз къакъатун кхьизва,

Амма адай цIийи гуьруьш аквазва.

Сагърай, зи дуст, гъил кьун, рахун куьз я мад,

Дерт чIугвамир, рцIамра гъам кIватI мийир.

И уьмуьрда кьиникь туш са цIийи затI,

Яшамиш хьун – гьамни туш са затI цIийи.

Урус чIалай,