Главная страница Случайная страница
Разделы сайта
АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника
Я расул.
|
|
Вун я вири махлукьатдин дамахдин дагъ, я расул!
Муьгьуьббатди кузвайбурун вун я чирагъ, – я расул!
Дережадиз виниз къилих, мурадрин чагъ, я расул!
Халкьдин чIехи къудратдалди хьанвай хкягъ, я расул!
Вун я хкахь тийир чIехи пакаман рагъ, я расул!
Низам-къайда тун паталди вун дуьньядиз атана,
Вун Аллагьдин патав фена, цавун бушлух атIана,
Илагьиди ви мурадар вири кьилиз тухвана,
Шадвал ийиз, чарх ягъиз вал, малаикри лагьана:
«Ваз хвашкалди, Аллагьдин дуст, хьурай вун сагъ,
я расул!»
Ви пак къамат махлукьатдиз тамамдаказ акуна,
Пайгъамбаррин руьгьеризни вуна иман авуна,
На къалурай мужизатри халкьар туна тавуна,
Им ваз лайих дережа я и дуьньядин дугуна,
Вун варз я чи, зкуь ийир чилин утагъ, я расул!
Вун гьам эвел, гьам эхир я пайгъамбаррин дестеда,
Абур садни амач, жанлу сад я вун ви жергеда.
Ви пак жасад жавагьир я, вичиз тай-туьш тежедай,
И дуьньядин чкIай багъдал чан хкиз вун къекъведа,
Вуна кьунва чилин винел генг цавун тагъ, я расул!
Вун гьахъвал гвай падишагь я, зун я гьакIан бейниван.
Зун гьар чIавуз ви вилик ква, хуьзва за ви дин-иман.
Вун зи панагь хьана, язва, жеда мадни даиман,
Зи муьгьуьббат са вахъди я, валди адал ала чан,
Хуьдай чIуру рекьикай чун къеле-синагъ, я расул!
Алкьвадар Гьасан
(1834 –1910)
Эхиримжи керематар
Эхиримжи керематар кьуьд я гъайиди,
Зун кьама ял авайди туш, жуван къимет ава чиз
Яшамиш жез, затIни авач за уьмуьрдиз гайиди,
Емдихъ къекъвер ничхир хьиз зун хьана, къастар авачиз.
Чирвилерихъ хьана къаних, цихъ деве хьиз къумлухда,
Цив ацIанвай целер вичел алайтIани залан яз.
Заз крсинай багъ акъатна емишрин сан буллухдай,
Багъ кьурана. Чарар-цIарар зи кар хьана, масан яз.
Кар-чIал квахьна къекъвенай зун, авачиз са мурадни,
Заз акI тир хьи, сирнавзава ацIай вацIун лепейра.
Къуй Аллагьди гъил къахчурай – кIандач мад заз са
затIни –
За авур кьван гунагьрилай за уьмуьрдин легьзейра.
II
ФАТИГЬА
(Къуръан, 1-сура)
РикI кудай, регьимлу Аллагьдин баркадиз.
Аферин Аллагьдиз – алемрин Агъадиз,
РикI кудайдаз ва регьимлу тирдаз,
Дувандин юкъуз гьукум ийирдаз!
Чна Ви вилик чи юкь къатзава,
Вавай куьмек кIанз, дад-бидадзава.
Твах чун дуьз рекьяй! На хъсанвал низ
Авунат1а, чун твах гьабрун рекьиз –
Ви чIехи хъилек такатайбурун,
На тyxвaй рекьяй такъатайбурун.
Араб чIалай.
Рудаки
* * *
Тек са душман гзаф я, чIур ийиз гуьгьуьл.
Амма виш дуст инсандиз тIимил я, тIимил.
* * *
Гатфарин югъ гуьлуьшан я – атирлу, вили.
Амма заз йиф багьа я вун гъайи зи кьилив.
* * *
Дерт жечни бес: чалагъандин уьмуьр кьве виш йис жеда.
Чубарукдин уьмуьр куьруь – анжах са йис – куьз жеда?
* * *
Захъ гала вун; кичIезва заз вун хъфиз, зун азабда тваз.
Гьисабда за юкъуз сятер, йифиз гъетер гьисабда за.
* * *
Кучудна вун, вегьена накьвни, шимни ккIалар,
Амма факай сурани ийизва на хиялар.
* * *
Дердини вилик вегьенвайбур азабрин гъам – гьабур чун я.
РикIе цIай аваз, чкIизвайбур вилерай гъам – гьабур чун я.
Мидя къуватри кутунвайбур викIиник терс кьисметдин,
Фелекди хурук кутунвайбур лепейрал хам – гьабур чун я.
* * *
Атирни ранг багъишна ваз яру къизилгуьлери:
Ранг – къекъифай хъуькъвер патал, атир – яргъи кифериз.
На чин чуьхвей яд ал жеда; цав атирдай ацIуда,
На ви чIарар чукIурайла ранг алай ви вилерин.
* * *
«Атана...» – «Вуж?» – «Азизди». – «Мус?» – «Алукьайла
пакам сегьер».
«Катзавай ам душандикай...» – «Вуж я душман?» –
«Буба-зегьер» –
«Пуд сефер за гана темен...» «Низ?» – «ПIузарриз
играмидан».
«ПIузарриз?» – «Ваъ», – «Куьз?» –Лаалдиз[45]». –
«Гьихьтин?» – «Гуя ширин шекер».
* * *
Аллагьди зун къутармишна гъамуникай, регьимна заз,
Машгьур тIварни акъул-камал, сагъламвални эдеб аваз.
Эгер и кьуд ери-сифет низ ганватIа Халикьди чи,
Гьа касдин рехъ фида яргъал, са дерт-гъамни шел-хвал
такваз.
* * *
Килиг вун и дуьньядиз акьуллу виляй,
Дикъетлувал, уяхвал тушиз гьич кими.
Дуьнья гьуьл я. Сирнавиз кIан ятIа эгер,
Хъсан, халис крарин туькIуьра гими.
* * *
Акьулдинни Камалдин багъда вун зул я,
Гуьлуьстанда ашкъидин – гатфар я, гатфар.
Пайгъамбардин гузва тIвар муьгьуьббатди заз,
Амма вун я ашкъидин – вун! – первердигар.
* * *
Гьайиф, гьайиф, камалэгьли бубадиз
Жеда велед акьул кьери ва начагъ.
Ирс яз хциз тадач ахьтин бубади
Вичин дерин чирвилерни бажарагъ.
* * *
Чан алайди фида суруз, кьейидини хъийич къарагъ,
Дуьнья гьа икI туькIуьр хьанва куькIвей къалай цаварал
рагъ.
Фарс чIалай.
|
|