Чепелукь

Эй чепелукь даим ашукь экуьнал,

Рази я жал вун ви чан цIа туьхуьнал?

Ви ашукьвал буьркьуьвал я, я кьейди!

ЦIайни буьркьуь я хьи – вични куькIвейди!

Къвез акьазва вун зи йифен дакIарда,

Кьару хьана зи лампадин парпардал.

Вилер ганва хупI дакIардин шуьшедиз,

Гуя дуьнмиш хьана ам зи рикIе дуьз:

Ада вун цIув агудзавач, я кьейди,

Бедбахтвилик акудзавач, я кьейди!

Хкадарда, ингье, килиг, лампа за,

Зи пенжерни ахъайда ваз ахпа за.

Вун кун тийир цIай зи рикIин кьатIана,

Гьахьдани вун зи къазмадиз атана?

Ваъ! Квахьна вун мичIи йифен къурсахда

Вун алугдай са лампадин суракьда…

Зазни кIандай ахьтин са цIай-лаван саз,

Герек, гьайиф тежен заз а цIа чан тваз.

1995

* * *

Чепелукьди чепелукь цIал тухуда,

Вични, гьамни цIун мецерив вугуда.

Жанавурди жанавурдиз суьруьдал

Вегьидай са жигъир къалур ийида.

Билбил хъиткьин жеда къизгъин манида,

Муькуьдини – хъиткьинайдан дердидай.

Инсандини инсан цIа тваз тухуда,

Вичиз игит, адаз хаин лугьуда.

Инсандини инсан халкьар къирмишдай

Рекьел гъида, адаз тажар багъишда.

Инсан кьейи чIавуз инсан ишеда,

Инсан хайи чIавуз инсан хъуьреда.

Гьашаратдиз, ничхирдиз ва гьайвандиз –

Гьардаз вичин макьсад чизва хъсандиз.

Амма, инсан – акьул авай гьашарат,

ХупI залан пар тушни ваз ви башарат?!

Амма, инсан, гьашарат кьван акьулди

Ви мурадра цифер твазва рагъул тир.

Писвал авун – жуваз авур гьисаб я,

Масадаз жув къурбанд авун суваб я.

I996