Кондак 4. Бурю волн словом уст Твоих укротивый, Иисусе, Творче мира и стихий Повелителю, утиши бурю страстей в сердцах человек

Бурю волн словом уст Твоих укротивый, Иисусе, Творче мира и стихий Повелителю, утиши бурю страстей в сердцах человек, призывающих имя Твое святое, да пребудут в тишине, единомыслии и любви нерушимей, зовуще: Аллилуиа.

Икос 4

Слышаша ученицы Божественныя Твоя и премудрыя глаголы ужасахуся, глаголюще: «Кто может спасен быти?» Ты же, скорбя о жестокосердии сердца человеческаго, отвещал еси им, яко «вся возможна суть у Бога». Темже и мы вопием Ти:

Иисусе, научи нас творити волю Твою, да пребудем в любви Твоей.

Иисусе, наставляяй нас любити Тя не словом токмо или языком, но делом и истиною, даждь нам ктому не оскорбляти любве Твоея.

Иисусе, запрети духу злобы, иже научает ны ненавидети брата нашего.

Иисусе, всели в сердца наша дух кротости и незлобия.

Иисусе, Свете паче всякаго света.

Иисусе, радость паче всякия радости.

Иисусе, упокоение паче всякаго упокоения.

Иисусе, жизнь вечная и нескончаемая.

Иисусе, Солнце любве незаходимое, научи и нас любви Твоей.

Кондак 5

Боготочною Кровию Твоею, на Кресте излиянною, Иисусе, избавил еси ны от власти темнаго духа злобы, и смертию Твоею словеса Твоя запечатлел еси, яко воистину несть больше тоя любве, иже аще кто душу свою положит за други своя. Ты же, Спасе наш, не токмо за други Твоя, но и за распинающия Тя молился еси ко Отцу Твоему. Темже благодарными усты и благодарным сердцем вопием Тебе: Аллилуиа.

Икос 5

Видеша ученицы Твое неизреченное милосердие, яко болящия исцеляеши, мертвыя воскрешаеши, всяк недуг душевный и телесный врачуеши, познаша Тя, Бога любве, и проповедаша Евангелие Твое всей твари. Мы же вопием Ти:

Иисусе, всякий дар любве приемляй, приими и наше недостойное славословие.

Иисусе, умягчи наша жестокая и окамененная сердца.

Иисусе, отжени от нас гнев и памятозлобие.

Иисусе, помози нам не осуждати брата нашего.

Иисусе, научи ны зрети прегрешения наша.

Иисусе, смиривыйся даже до смерти, отдали от нас гордость и высокоумие.

Иисусе, согрей теплотою любве Твоея хладныя души наша.

Иисусе, свободи нас от уныния и печали.

Иисусе, изведи души наша из мрака отчаяния.

Иисусе, Солнце любве незаходимое, научи и нас любви Твоей.

Кондак 6

Проповедник Божественныя любве Твоея, о Иисусе, явися возлюбленный Твой ученик и Апостол Иоанн Богослов, иже любовь совершенную стяжав, и нам друг друга любити заповеда, да в единомыслии и любви зовем Ти: Аллилуиа.

Икос 6

Возсиял еси вселенней, Христе, Свете истинный, просвещающий всякаго человека, грядущаго в мир. Темже и мы, светом лица Твоего просвещеннии, взываем Ти сице:

Иисусе, источниче жизни, отверзи очи сердца нашего, да узрим Тя, истинное Солнце правды.

Иисусе, рекий, яко «грядущаго ко Мне не изжену вон», не отрини нас, приходящих к Тебе.

Иисусе, не остави нас, аще и многажды оставихом Тя.

Иисусе, взыщи нас, яко заблуждшее овча.

Иисусе, приведи нас в дом Отца Твоего.

Иисусе, изыди на взыскание наше.

Иисусе, объятия Отча отверсти нам потщися.

Иисусе, в чертог Твой украшенный введи нас.

Иисусе, ризу нам подаждь светлу и одеждею нетления облецы нас.

Иисусе, Солнце любве незаходимое, научи и нас любви Твоей.